Հայաստանի նախագահ Արմէն Սարգսեան յայտարարութիւն տարածած է, կոչ ընելով Ապրիլ 24ին «յարգեու մեր նախնիներու յիշատակը եւ հոգալու մեր ազգի ապագան արժանապատուօրէն ու պատուով»:
Ստորեւ կը ներկայացնենք յայտարարութիւնը ամբողջութեամբ․
«Սիրելի՛ հայրենակիցներ,
Վաղը համայն հայ ժողովուրդը` առաջադէմ մարդկութեան հետ, աշխարհի բոլոր մայրցամաքներուն մէջ պիտի ոգեկոչէ Մեծ Եղեռնի զոհերուն յիշատակը:
Ապրիլ 24ը սուրբ եւ համընդհանուր է բոլոր հայերու, աշխարհի քաղաքակիրթ մարդկութեան համար:
Այդ օրը ոչ մէկ հայ չի կրնար դուրս գալ միւսի դէմ:
Հարիւր տարիէ աւելի այս օրը եղած է միասնութեան օր, յիշատակի եւ սուգի օր, ընդդէմ Թուրքիոյ կողմէ իրագործուած անարդարութեան եւ այսօր ցեղասպանութիւնը ժխտողներու դէմ բողոքի օր:
Յարգենք մեր նախնիներու յիշատակը եւ հոգանք մեր ազգի ապագան արժանապատուօրէն ու պատուով:
Պահենք եւ պահպանենք աշխարհի աջակցութիւնը եւ համերաշխութիւնը մեր հանդէպ Ապրիլ 24-ին, երբ մեզի հետ միասին կը յարգեն զոհերու յիշատակը եւ կը յիշեն զանոնք, որոնք օգնած են վերապրողներուն:
Այսօր, վերապրողներու ժառանգներուս պարտքն է համախմբել մեր ժողովուրդը ազգային իդէալներու շուրջ, լուծել մեր ներքին խնդիրները միասնաբար` երկխօսութեան եւ փոխըմբռման ոգիով, խթանել ժողովուրդի ստեղծարար ուժերը, կերտել դինամիկ զարգացող ժամանակակից Հայաստան, որ հպարտութեան առարկայ ըլլայ աշխարհի բոլոր հայերուն համար եւ ունակ` պաշտպանելու հայ ժողովուրդի անանձ իրաւունքները»: