«Արմենփրես»․- Աշխարհահռչակ երգիչ Էլթոն Ճոն իր հիմնադրամի երեկոյթին պիտի ներկայացնէ Հայոց Ցեղասպանութեան մասին պատմող The Promise ֆիլմը, կը հաղորդէ Էլթոն Ճոնի հիմնադրամը։
Փետրուար 26ին պիտի կայանայ երեկոյթը, որուն պիտի մասնակցի նաեւ հիմնադրամի նախագահ Տէյվիտ Ֆուրնիշը:
«Մեզի համար բաւական է միայն տեսնել ՄԻԱՒ/Ձիահի (AIDS) համաճարակի տարածման ընթացքը 1990ականներու կէսերուն Ռուանտայի ցեղասպանութենէն ետք, որպէսզի հասկնանք մարդու իրաւունքներու կոպիտ խախտումներուն եւ վայրագութիւններու ու հանրային առողջութեան ճգնաժամին կապը: Մանուկեաններու ընտանիքի եւ արտադրող Էրիք Էսրայէլեանի հետ ընկերութեան իբրեւ արդիւնք ես եւ Տէյվիտը աւելի շատ տեղեկացած են Հայոց Ցեղասպանութեան եւ այսօր հասարակական կեանքի վրայ անոնց ազդեցութեան մասին», ըսած է Էլթոն Ճոն:
Ան աւելցուցած է, որ The Promise ֆիլմը կ՝արտացոլէ, թէ ինչպէս կարելի է յիշել անցեալի վայրագութիւնները եւ սորվիլ սխալներու վրայ: «Մենք լի ենք վճռականութեամբ այս հրաշալի ֆիլմին մասին տեղեկատուութիւն տարածելու հարցով, որպէսզի ստիպենք մարդոց անմիջապէս գործելու: Մենք պատիւ ունինք մեր երեկոյին ընթացքին ձեզի ներկայացնելու The Promise ֆիլմը», ըսած է երգիչը:
Էլթոն Ճոնի հիմնադրամի նախագահ Տէյվիտ Ֆուրնիշ, իր հերթին, ընդգծած է, որ իրենց համար մեծ պատիւ է հիմնադրամի շարժանկարի ակադեմիայի մրցանակաբաշխութեան ծիրէն ներս ներկայացնել մեծ բարերար Քըրք Քըրքորեանի միջոցներով նկարահանուած ֆիլմը:
