Թորոնթոյի “Նայիրի” երգչախումբը
Մայիս 5ի երեկոյեան, ժամը 7:00ին, Թորոնթոյի Քորէական ՙFull Of Joy՚ կեղեցւոյ մէջ տեղի ունեցաւ միջազգային երաժշտական երեկոյթ, բաղկացած եօթը երգչախումբերէ, որոնք ներկայացուցին վեց ազգութիւններ: Այս ելոյթին իրենց մասնակցութիւնը բերին նաեւ Թորոնթոյի “Նայիրի” եւ Հայ պատանեկան “Նուռ” երգչախումբերը: Անոնք միասնաբար երգելով տօնախմբեցին զանազան մշակոյթներու ազգային երգերու նմոյշներ՝ իրականացնելով ՙՄիասին Երգելու՚ նշանաբանը:
Քսաներեք տարուան կեանք ունեցող այս կազմակերպութեան նպատակը եղած է երգով ծանօթացնել տարբեր մշակոյթներու երաժշտութիւնը: Ահա այդ նպատակով՝ Թորոնթոյի քսանամեայ ՙՆայիրի՚ երգչախումբը իր մասնակցութիւնը բերաւ այս տարի եւս ՙՄիասին Երգենք՚ ծրագիրին:
Այս երգչախումբը քսան տարիներու ընթացքին եղած է գործունեայ Թորոնթոյի հայ համայնքէն ներս: Ելոյթ ունեցած է Թորոնթոյի բազմամշակութային տարեկան համերգ ու փառատօներուն:
Երգահանդէսի յայտագրի բացման տուտուկահար Վահան Ուրութեան նուագեց ՙԵրանի Թէ՚ երգի երաժեշտութիւնը: Ապա՝ Թորոնթոյի ՙՆայիրի՚ երգչախումբը խմբավարութեամբ Սօնա Յովսէփեանի՝ դաշնակի ընկերակցութեամբ Թալին Քէլէպօզեանի՝ ներկայացուց երեք հայերէն երգեր՝ Թաթուլ Ալթունեանի ՙՀոյ Նար՚, Գուսան Շահէնի ՙԶէփիւռի Նման՚« եւ Առնօ Պապաճանեանի ՙԱզգ Փառապանց՚ երգերը:
Ազգային ժողովրդական երգերու մէջ որպէս մենակատարներ հանդէս եկան Մովսէս Հայիթեան, Արա Տէր Յարութունեան եւ Ալենուշ Պաղումեան, որոնք իրենց գեղեցիկ ձայներով աւելցուցին համերգին փայլը:
Սիւն երգերը նուիրուեցան գեղարուեստական ղեկավար եւ խմբավար՝ ողբացեալ Սարգիս Համպոյեանի յիշատակին, որ 2002էն մինչեւ իր մահը իր ժրաջան ու նուիրեալ աշխատնքով շարունակեց իր ներդրումը բերել ՙՆայիրի՚ երգչախումբի յառաջդիմութեան ու վերելքին:
Այս առիթով, պէտք է անդրադառնալ երգչախումբի հիմնադիր ու կազմակերպիչ Մարինա Տորնային, որ քսան տարիներ առաջ կեանքի կոչեց այս երգչախումբը եւ իր կորովն ու ժամանակը անսակարկօրէն նուիրեց ՙՆայիրի՚ երգչախումբի գոյութեան եւ կենսունակութեան:
Երգահանդէսին իրենց մասնակցութիւնը բերաւ նաեւ Հայ Պատանեկան ՙՆուռ՚ երգչախումբը, որ ծնունդ առած է 2012ին ՙՕքվիլ՚ի հայ շաբաթօրեայ վարժարանէն ներս: Ֆրանք Փէթիզեանի խմբավարութեամբ պատանեկան այս երգչախումբը վերջին չորս տարիներուն ծաղկեցաւ, հասարակութեան հրամցնելով հայ երգը, յաճախ ժամանակակից ոճով՝ ընկերակցութեամբ տարբեր երաժշտական գործիքներու:
Տասնհինգ հոգինոց երգչախումբը ներդաշնակ կերպով ներկայացուց Նուայր Պէյլէրեանի ՙԱրի Մեր Տուն՚, ՙԷշլիկին Երգը՚, Սիլվա Յարութունեանի ՙԹրթուր եւ Թիթեռնիկ՚, Ճօն Լէնօն եւ Փոլ Մաքարթնի ՙAll Together Now՚ երգերը:
Նուագախումբին կ՛ընկերակցէր կիթառի վրայ Ալէք Փէթիզեան եւ Հրակ Համպոյեան, Պուզուքի Պաս՝ Ռոպ Փէթիզեան, Թմբուկի վրայ՝ Սօֆի Համպոյեան:
Յայտագրին վերջին բաժինը բոլոր երգչախումբերը միասնաբար ներկայացուցին երկու խմբային երգեր՝ հարիւրէ աւելի ձայներով ու երկու տարբեր խմբավարներով:
Սիրոյ, համերաշխութեան եւ լաւատեսութեան խօսքերով վերջ գտաւ երեկոյթը: