Յարութ Տոնոյեան
27 տարի առաջ նոր էջ մը բացուեցաւ հայոց պետականութեան հոլովոյթի պատմութեան մէջ. Հայաստանի Երրորդ Հանրապետութիւնը դարձաւ փաստ եւ իրականութիւն: 1991ի ժողովրդային հանրաքուէն եկաւ ձայներու բացարձակ մեծամասնութեամբ ՙայո՚ ըսելու անկախութեան ընտրանքին:
Միջազգային եւ տարածաշրջանային սրընթաց վերիվայրումները, ռազմաքաղաքական կտրուկ փոփոխութիւնները եւ արցախեան թէժ մարտերը պարտադրեցին այնպիսի իրավիճակ, որ Հայաստան պիտի ընտրէր իր ինքնուրոյն ուղին, պիտի ընթանար այն ճանապարհով« որ տարրական իրաւունքն է իւրաքանչիւր ժողովուրդի: Անկախ էր Հայաստանը եւ պատրաստ` միանալու միջազգային մեծ ընտանիքին:
21 Սեպտեմբեր 2018 թուաականին թորոնթոհայութիւնը բացառիկ առիթը ունեցաւ վայելելու Հայաստանի եւ Արցախի Հանրապետութեանց անկախութեան 27րդ ամեակի տօնակատարութիւնը՝ նախաձեռնութեամբ 27ամեակի տօնակատարութեան Թորոնթոյի միացեալ մարմնի:
Սոյն տօնակատարութեան բացումը կատարուեցաւ Գանատայի« Հայաստանի եւ Արցախի Հանրապետութիւններու քայլերգներով, ապա բացման խօսք արտասանեց օրուան հանդիսավար Յարութ Տոնոյեանը` ընդգծելով, որ հայութեան համար անկախութեան նուաճումը երկնատուր պարգեւ մը չէ, պատահական իրադարձութեանց հետեւանքը չէ, այլոց կամքին եւ քմայքին արգասիքը չէ, այլ` դարերու խորքէն եկած պատմութեան արձագանքը, հարիւրամեակներու գոյապայքարի մը արդիւնքը, հերոսական սխրանքներու բնական եւ արդար վաստակը: Այնուհետեւ հնչեց Գանատայի մէջ Հայաստանի դեսպան Լեւոն Մարտիրոսեանի ողջոյնի ուղերձը:
Հայաստանի եւ Արցախի Հանրապետութեանց անկախութեան 27րդ ամեակին նուիրուած տօնակատարութիւնը յատկանշական էր գեղարուեստական իր բազմազանութեամբ: Համազգայինի ՙԳուսան՚ երգչախումբը ներկայացուց հայրենասիրական երգերու փունջ մը` Հռիփսիմէ Տէմիրճեանի ղեկավարութեամբ: Երգչախումբին յաջորդեց Յովհաննէս Շիրազի ՙՈրդիս քեզ ի՛նչ կտակեմ՚ բանաստեղծութիւնը Վանա Գազանճեանի կատարողութեամբ:
Օրուայ բանախօսն էր ՀՕՄի ամէնօրիայ վարժարանի տնօրէն Րաֆֆի Սարգիսեան, որ մանրամասն ներկայացուց Ոսկեայ տառերով գրուած Հայ ժողովուրդի պատմութեան ամբողջ ընթացքը` կարեւոր անդրադարձ ունենալով Արամ Մանուկեանի գլխաւորութեամբ Հայաստանի Առաջին Հանրապետութեան ստեղծման, որ գրաւականը դարձաւ Երրորդ Հանրապետութեան ստեղծման ու կայացման: Սարգիսեան նաեւ ընդգծեց հայ ժողովուրդի դիմաց յառաջացած ժամանակակից մարտահրաւէրներու յաղթահարման ճանապարհին միասնականութեան կարեւորութիւնը, որպէս երաշխիք եւ գրաւականª կայուն եւ զարգացած Հայաստանի յարատեւութեան:
Բանախօսին յաջորդեց Դալար Սիմոնեանի կատարողութեամբ ՙԵրեւանս՚ եւ ՙՄարտիկի երգ՚ ստեղծագործութիւնները` դաշնակահար Վրէժ Ղազարեանի ընկերակցութեամբ: Գէւորգ էմինի ՙՍասունցիների պարը՚ բանաստեղծութեամբ ելոյթ ունեցաւ Մատլէն Սահակեան` ոգեշնչելով ներկաներուն ազգային կամքն ու յաղթական ոգին:
Հայաստանի եւ Արցախի Հանրապետութեանց անկախութեան 27րդ ամեակի տօնակատարութեան գեղարուեստական մասն ամփոփեց Համազգայինի ՙԷրեբունի՚ պարախումբը Քոչարի եւ ազգագրական այլ պարերու շարքով:
21 Սեպտեմբեր 1991 թուականի բացառիկ յաղթանակի առթիւ ներկաներուն իր հայրապետական խօսքը փոխանցեց Գեղարդ ծայր․ վարդ․ Քիւսպէքեանը:
Յատկանշական է արձանագրել այն փաստը« որ հայը դարեր շարունակ եղած է պայքարող եւ յաղթող ժողովուրդ: Մեր պատմութիւնը նաեւ հարստացած է սրընթաց վերիվայրումներով, սակայն հայը յաղթահարած է Հայրենիքի դիմաց ծառացած բոլոր տեսակի մարտահրաւէրները:
Այսօր ալ մենք կը գտնուինք մեր Հայրենիք՝ Հայաստանը առաւել զարգացած, առաւել մրցունակ, աշխարհի զարգացած ժողովրդավարութիւններու, կայացած տնտեսութիւններու հետ ոտք մեկնող երկիր դարձնելու կարեւոր հանգրուանին մէջ:
Միայն միասնաբար, հայութեան լաւագոյն ներուժը համախմբելով կրնանք հասնիլ այդ բաղձալի նպատակին: Հզօր, զարգացած, բարեկեցիկ Հայաստանի երազը իրականութիւն դարձնելու ժամանակն է արդէն: