2020ին Արցախի Հարաւը Հայաստանին Կապող Ճանապարհ Պիտի Կառուցուի


“Ազատութիւն”,- ՀՀ Անվտանգութեան խորհուրդի քարտուղար Արմէն Գրիգորեան Յուլիս 23ին, «Ազատութիւն» ռատիոկայանին հետ զրոյցի ժամանակ յայտնած է, որ ՀՀ կառավարութիւնը կը ծրագրէ 2020 թուականին Արցախի Հանրապետութիւնը Հայաստանին կապող 150 քիլոմեթր ճանապարհ կառուցել։ Ան յայտնած է, որ որոշումը արդէն կայացած է:

«Հարաւային ուղղութեամբ` Կապանէն մինչեւ Հադրութ ճանապարհը կը քննարկուի, եւ ես յուսով եմ, որ մինչեւ տարուան վերջը մենք պիտի ամփոփենք այս քննարկումները եւ արդէն պիտի ունենանք ճանապարհային քարտէզ, թէ ինչպէս պիտի կառուցենք այդ ճանապարհը»,  ըսած է Գրիգորեան:

Ան աւելցուցած է, որ կը նախատեսուի ճանապարհը կառուցել կարճ ժամանակի մէջ` 2020ին, կառուցման ֆինանսական միջոցները կան:

Նշենք, որ ամիսներ առաջ Արցախի Ազգային ժողովի նիստին ժամանակ պատասխանելով Արցախը Հայաստանի հետ կապող երրորդ՝ Հադրութ-Մեխակաւան-Կովսական-Կապան ռազմավարական ճանապարհի կառուցման հարցին՝ Բակօ Սահակեան նշած է, որ նախնական քննարկումներ տեղի կ՛ունենան ՀՀ վարչապետին, նախագահին, «Հայաստան» համահայկական հիմնադրամի տնօրէնութեան եւ ՀՀ փոխադրամիջոցներու նախարարին հետ: Հաւանական է, որ Արցախի հարաւը Հայաստանի հետ կապող ճանապարհին կառուցումը դառնայ «Հայաստան» համահայկական հիմնադրամին կողմէ Արցախի մէջ իրականացուելիք յաջորդ ծրագիրը:

Այդ ճանապարհի կառուցումը ռազմավարական նշանակութիւն ունի, որ պիտի նպաստէ Արաքսի հովիտի զարգացման։