Յունիս 22ի երեկոյեան, Թորոնթոյի երիտասարդական համալիրի Համազգային Թատերասրահը , լեցուն էր ծնողներու, հարազատներու հոծ բազմութեամբ, ինչպէս նաև ներկայութեամբ՝ Հայ կեդրոնի երդիքին տակ գործող միութիւններու ներկայացուցիչներու, նահանգային երեսփոխան Արիս Պապիկեանի, բարերարներու, նուիրատուներու, դպրոցասէրներու, նախկին և ներկայի տնօրէններու , կրթական մշակներու և հիւրերու։
41 աշակերտ–աշակերտուհիներ սրահէն ներս հանդիսաւոր մուտք կատարեցին՝ բեմին վրայ ունկնդրելէ ետք Գանատայի և Հայաստանի օրհներգները , գրաւեցին իրենց տեղերը։
Հայերէն լեզուի և պատմութեան ուսուցչուհի Յասմիկ Պապեան և անգլերէն լեզուի ուսուցչուհի Սարիկ Պապեան,հայերէն և անգլերէն լեզուներով կատարեցին բացման հանդիսութիւնը։
ՀՕՄի Պապայեան մանկապարտէզը, Գոլոլեան նախակրթարանն ու միջնակարգը աւարտելով , այս 41 պարման –պարմանուհիները գիտելիքներով զինուած, հրաժեշտ տուին միջնակարգին և նոր մարտահրաւէրներու դիմաց կանգնած՝ խրոխտ ու վճռական անցան Լափոյեան երկրորդական։ Անցնող 11-12 տարիներու ընթացքին անոնք հասակ առին այս հայաբոյր ու ապահով ովասիսին մէջ, դաստիարակուեցան հայեցի կրթութեամբ, ամբարեցին գիտութիւն, զարգացուցին իրենց միտքը , ազնուացուցին իրենց հոգին , ճանչցան զԱստուած և եղան բարիին ու ճշմարիտին ջատագովները։ Ամփոփելով, ՀՕՄի Ամենօրեայ Վարժարանը իրագործելով իր առաքելութեան կարգախօսը, տուաւ գերազանց ուսում, տիպար նկարագիր և հայեցի դաստիարակութիւն։
Ամավերջի հանդէսները միշտ ալ իրենց հետ կը բերեն յուզումի և հրճուանքի խառն զգացումներ, խորհրդածութիւններ, սակայն այս տարուան շրջանաւարտներուն համար առաւել ևս նշանակութիւն ունեցաւ այս հանդէսը , անոնք լիացած էին հպարտութեամբ, որովհետեւ Հայաստանի առաջին անկախացման հարիւրամեակի շրջանաւարտներ էին. ապրումով կատարեցին խմբական արտասանութիւն մը՝ Ժագ Յակոբեանի «Մենք»ը, ձօնելով զայն Հայաստանի անկախացման հարիւրամեակին։
Երեք աշակերտուհիներ՝ Մեղեդի Պէքմէզեան (Հայերէն) , Ալիսա Չուլճեան (անգլերէն) և Վերոնիք Այնէճեան (ֆրանսերէն) իրենց դասընկեր– դասընկերուհիներու անունէն կարդացին իրենց ուղերձները։
Վարժարանի տնօրէն Րաֆֆի Սարգիսեան շնորհաւորելով աշակերտներն ու ծնողները , միաժամանակ գնահատեց ծնողներու կատարած նիւթաբարոյական զոհողութիւնները և դրուատեց Հայ վարժարանի հանդէպ ցոյց տուած անոնց վստահութիւնն ու համագործակցութիւնը։ Այնուհետեւ , կատարեց մրցանակաբաշխութիւթիւնը։
Բեմահարթակ հրաւիրուեցան ութերորդ դասարանի ուսուցիչ–ուսուցչուհիները, որպէսզի կատարուի վկայականներու բաշխումը։ Պարոն Սարգիսեան, հպարտութեամբ յայտարարեց վարժարանի առաջին տնօրէն, այժմ հայաստանաբնակ Մարգար Շարապխանեանի ներկայութիւնը և հրաւիրեց զայն, որպէսզի շրջանաւարտներուն յանձնէ վկայականները։ Սարգիսեան անխառն ուրախութեամբ և յուզումով յիշեց 21 տարիներ առաջ ՀՕՄի ութերորդ դասարանէն շրջանաւարտ ըլլալը և Մարգար Շարապխանեանի ձեռամբ իր վկայական ստանալը։
Հանդէսը աւարտեցաւ շրջանաւարտներու հանդիսաւոր ելքով։ Բարի՛ երթ դէպի Լափոյեան երկրորդական և անկէ՝ դէպի լուսաշող ապագայ։
