Օսան Փիլավճեան
Հայր Մեղրիկ Բարիքեանի՝ Ս․ Աստուծածին եկեղեցւոյ ծառայութեան շրջանին (2003-2014) Թորոնթոհայ եկեղեցին եւ գաղութը ապրեցաւ իր զարթօնքի տարիները։
2003-ին գործուղուեցաւ Թորոնթօ (Գանատա) որպէս հոգեւոր հովիւ Ս․ Աստուածածին եկեղեցւոյ։ Մեր եկեղեցական կեանքը աշխուժացաւ եւ շուտով Հայր Մեղրիկի իւրայատուկ նուիրումով ու ժրաջան աշխատանքով նոր շունչ ստացաւ։
Նոր ոգեւորութեամբ եւ լասատեսութեամբ լեցուց բոլորիս սրտերը։ Իր խորհուրդներով շատերուն կեանքը փոխեց․Շէնցուց թորոնթոհայ գաղութին կեանքը։ Երիտասարդ, պատանի, ոսկեայ տարիքի անհատներ եւ դպրոցական աշակերտներ, բոլորին առաջնորդեց դէպի աղօթքի կեանք, հոգեւոր ճանապարհն առ Աստուած:
Ես Հայր Սուրբին ծանօթացայ 2003 Ապրիլին եւ յաջորդ օրն իսկ խնդրեցի իրմէ ծանօթանալ ընտանիքիս անդամներուն ընթրիքի մը ընթացքին։ Այդ օրէն սկսեալ ան եղաւ մեր ընտանիքի անդամներէն մէկը։ Մենք եղանք ծնողք Հայր Սուրբին ինք եղաւ եղբայր Թամարին, Վանիկին եւ Արարատին։
Իր մտերմութիւնը ապրեցանք կեանքի ուրախ եւ տխուր առիթներուն։ Վայելելով կեանքի հանդէպ իր լաւատեսութիւնը։ Հայր Մեղրիկին միջոցաւ ունեցանք շատ լաւ շրջանակ մինչեւ օրս։
2014-ին, Գանատայի Հայոց Թէմի Առաջնորդ ընտրուելէ ետք, փոխադրուեցաւ Մոնթրէալ։ Կարճ ժամանակէ ետք, անձնական պատճառներով, Սրբազան հրաժարեցաւ եւ վերադարձաւ Մայրավանք։
Երանի կարենայինք աւելիով օգտուիլ Հայր Մեղրիկին կարողութիւններէն եւ իր անսահման նուիրումէն հայ եկեղեցւոյ եւ ժողովուրդին համար։
Հա՛յր Սուրբ, մեզի համար ողջ ես ու ողջ ալ պիտի մնաս։ Թորոնթոյէն հեռանալէդ ետք, դժուարութեամբ կրնայինք կապուիլ ձեր հետ։ Իսկ հիմա, ամէն օր, երկինք կը նայիմ ու հանգիստ կը խօսիմ հետդ․․․