Ապրիլ 23ի երեկոյեան Ազատութեան հրապարակէն սկիզբ առաւ ՀՅԴ երիտասարդական եւ ուսանողական միութիւններու աւանդական դարձած «Ջահերով երթը», որ տարիներէ ի վեր կը համախմբէ պահանջատիրութեան գաղափարը կրող հազարաւոր հայորդիներ: Այս տարի Ջահերով երթը կը կրէր «Անունս է պայքար եւ վախճանս` յաղթանակ» կարգախօսը:
Երթին կը մասնակցէին բազմահազար երիտասարդներ` տարբեր կուսակցութիւններէ, հասարակական կազմակերպութիւններէ, ուսանողական միութիւններէ, ինչպէս նաեւ քաղաքացիներ:
Երթը սկսելէ առաջ երիտասարդները` իբրեւ բողոքի արտայայտութիւն, այրեցին Թուրքիոյ դրօշակը եւ այդ կրակով վառեցին իրենց ջահերը:
Հազարաւոր երիտասարդներ` ջահերով, Հայաստանի, Ցեղասպանութիւնը ճանչցած պետութիւններու դրօշներով՝ Ազատութեան հրապարակէն շարժուեցան Ծիծեռնակաբերդի բարձունք, ուր յարգանքի տուրք մատուցեցին Հայոց ցեղասպանութեան զոհերու յիշատակին:
