Արցախի Հանրապետութեան Նախագահը Հանդիպում Ունեցաւ Արամ Ա․ Կաթողիկոսին Հետ


Արցախի Հանրապետութեան նախագահ Բակօ Սահակեան, Մարտ 21ին, Անթիլիասի մէջ հանդիպում ունեցաւ Մեծի Տանն Կիլիկիոյ Արամ Ա․ Կաթողիկոսի եւ կաթողիկոսութեան հոգեւոր դասի բարձրաստիճան խումբ մը ներկայացուցիչներու հետ: Հանդիպումի ընթացքին քննարկուեցան հայրենիք-սփիւռք, եկեղեցի-հասարակութիւն փոխյարաբերութիւններուն, Արցախի ներքին ու արտաքին քաղաքականութեան եւ տարածաշրջանային գործընթացներուն վերաբերող տարբեր հարցեր:

Նախագահը երախտագիտութիւն յայտնեց Արամ Աին Արցախին մշտապէս սատարելու համար` կարեւոր համարելով Մեծի Տանն Կիլիկիոյ կաթողիկոսութեան դերը Սփիւռքի մէջ հայ ազգային ինքնութեան պահպանման եւ հայրենիքի հետ կապերու ամրապնդման գործին մէջ:

Նոյն օրը Սահակեան մասնակցեցաւ Հայաստանի Հանրապետութեան անկախութեան 100ամեակին նուիրուած համաժողովի բացման հանդիսաւոր արարողութեան եւ հանդէս եկաւ ողջոյնի խօսքով:

Նախագահը նշեց, որ 1918 թուականը մեր ժողովուրդի պատմութեան ամենաբեկումնային ժամանակահատուածներէն էր, երբ հայ ժողովուրդը վերականգնեց դարեր առաջ կորսնցուցած իր ազգային պետականութիւնը:

Ան շեշտեց, որ 1918 թուականի սխրագործութիւնները եւ դարակազմիկ յաղթանակները մեր ժողովուրդին համար տասնամեակներ ի վեր եղած են ներշնչման եւ ոգեւորութեան իւրայատուկ աղբիւր: «Դժուար է գերագնահատել այն լիցքը, որ անոնք հաղորդեցին մեր ժողովուրդին Երկրորդ աշխարհամարտի տարբեր ճակատներու վրայ եւ Արցախեան ազատամարտի տարիներուն: Հիմա ալ անոնք, սփիւռքի եւ հայրենիքի մէջ մեր ժողովուրդի ազգային հպարտութեան ու կենսունակութեան կարեւոր բաղադրամաս կը հանդիսանան»։

Իր ելոյթին աւարտին՝ նախագահ Սահակեան ընդգծեց, որ Արցախը կանգնած է ամուր եւ հաստատակամ` Մայր Հայաստանի ու Սփիւռքի հետ միասին մաքառելու յանուն հայոց անկախ պետականութեան յետագայ զարգացման ու զօրացման, Հայրենիք-Սփիւռք կապերու ամրապնդման, յանուն պայծառ եւ յուսալի ապագայի:

Համաժողովին կը մասնակցին Մեծի Տանն Կիլիկիոյ Կաթողիկոս Արամ Առաջինը, Հայաստանի, Արցախի, Սփիւռքի եւ տարբեր երկիրներու գիտական, քաղաքական եւ հասարակական շրջանակներու ներկայացուցիչներ: