Լենա Տէր Պետրոսեան
Յարութիւն Դերձակեան
Համազգային ՙԳլաձոր՚ Մասնաճիւղի Գրասէրներու խմբակի հաւաքներու շարքին ծիրէն ներս, 25 Փետրուար յետմիջօրէին Հայ Կեդրոնի ՙՅարութիւն Մանուկեան՚ գրադարանին մէջ, յիշատակուեցաւ Պոլսահայ արդի հայ գրականութեան տաղանդաւոր բանաստեղծներէն Զարեհ Խրախունին (1926 – 2015)։
Բացման խօսքով հանդէս եկաւ Արտա Տէր Յակոբեան. ան յայտնեց թէ գրասէրներու խմբակի 6րդ տարեդարձն է եւ 2018 տարեշրջանի առաջին հանդիպումը։ Համազգայինի գրասէրներու խմբակը քառասունէ աւելի հաւաքներ յաջողցուցած է իր հիմնադրութենէն ի վեր։ Այս գրական գործունէութիւնը գրեթէ յիսուն տարիներէ աւելի կ’ երկարի գաղութէն ներս եւ այսօր եւս կը շարունակուի Թամար Տօնապետեան Գուզուեանի եւ գրական յանձնախումբի միասնական ջանքերով։ Վեց տարիներ առաջ առաջին առթիւ այս խմբակը ներկայացուց Վահան Տէրեանը, որու յաջորդեցին հայ գրականութեան քաջածանօթ բազմաթիւ գրագէտ եւ բանաստեղծներ։ Ան հակիրճ տողերով ներկայացուց օրուայ զեկուցաբեր Լանա Տէր Պետրոսեանի կենսագրականը եւ հրաւիրեց զայն, որպէսզի ներկայացնէ Զարեհ Խրախունին։
Քաղաքիս արժանաւոր երիտասարդուհիներէն Լանա Տէր Պետրոսեան ծնած է Թորոնթօ, իր նախնական ուսումը ստացած է Սուրբ Խաչ Ազգային ամենօրեայ վարժարանին մէջ, այդ շրջանին մասնակցած է միջվարժարանային արտասանական մրցումին, արտասանելով Խրախունիի ՙԱյս Ծառը Սուրբ՚ քերթուածը խլելով առաջնութեան մրցանակը։ Ան իր ուսումը շարունակած է ՀՕՄի Գոլոլեան վարժարանը։ Շրջանաւարտ եղած է Թորոնթոյի համալսարանի անգլերէն եւ ֆրանսերէն լեզուներու ճիւղերէն։ Ապա ուսանած է Ամերիկեան Middlebury College եւ Փարիզի Սորպոն համալսարանէն մագիստրոսի վկայականը ստացած ու Փարիզի համալսարանին մէջ երեք տարի ուսուցած։ Բազմաթիւ կարողութիւններով օժտուած Լանան մաս կը կազմէ Համազգայինի Գրասէրներու խմբակին, ինչպէս նաեւ Համազգայինի ՙԷրեբունի՚ պարախումբին։շ Ան Սպանիոյ զանազան քաղաքներուն մէջ հետեւած է պարի դասերու եւ ան եղած է շատ լաւ սպանական ֆլամէնկօ պարող մը։
Լանա Տէր Պետրոսեանը փոքր տարիքէն սկսեալ մեծ սէր ու համակրանք ունեցած էր բանաստեղծ Զարեհ Խրախունիի գործերուն հանդէպ։ Ան բովանդակալից բացատրութիւններ տուաւ Խրախունիին կենսագրութեան ու գրական վաստակին մասին, յայտնեց, թէ բանաստեղծ, գրաքննադատ, թարգմանիչ, թատերագիր, երաժիշտ, հնաբան եւ դաստիարակ Խրախունին իր բուն անունով Արթօ Ճիւմպիւշեան է եւ Ճիւմպիւշ կը նշանէ խրախճանք։ Խրախունին Պոլսոյ Մխիթարեան լիսէէն շրջանաւարտ ըլլալէ ետք, վկայուած է Իսթանպուլի համալսարանի փիլիսոփայութեան, ընկերաբանութեան եւ հոգեբանութեան մարզերէն մագիստրոսի աստիճանով։ Իսկ գրականութեան ու պատմութեան ուսումը կատարելագործած է Փարիզի Սորպոն համալսարանին մէջ։ Ուսուցչական պաշտօններ վարած է Կեդրոնական եւ Էսայեան լիսէներուն մէջ։ Գրական, գեղարուեստական բաժիններ խմբագրած է ՙՄարմարա՚ օրաթերթին մէջ եւ թարգմանած ու հրատարակած է մանկապատենական գրականութիւն։
Լանա Տէր Պետրոսեան ըսաւ, թէ ՙ20րդ դարու սկիզբը Վարուժանի, Սիամանթոյի, Թէքէեանի զարթօնքի սերունդով բիւրեղացած Արեւմտահայերէնի հոսանքը ընդհատուեցաւ պահ մը՝ 1915ի Ցեղասպանութեան պատճառով։ Բ․ Աշխարհամարտի աւարտին դարձեալ Պոլսոյ մէջ վերագտաւ իր հունը գլխաւորութեամբ Խրախունիի, Զահրատի, Հատտէճեանի, աւելի վերջ Սարըասլանի եւ ուրիշներու հոյլով։
Անոնք ունեցան քերթողութեան ազատ ոճ« առանց յանգի ու վանկի կաշկանդումներու« պահեցին երաժշտական ու կշռոյթի ինքնաբուխ նուրբ առանցք մը« ունեցան ճոխ բառամթերք« չափի եւ տողերու ճարտար ընտրութիւն՚:
Ան բացատրութիւններ տուաւ Խրախունիին գործածած մաքրամաքուր հայերէն ոճին մասին« բծախնդիր ու ճշգրիտ մանրամասնութիւններով։Յայտնեց՝ թէ Զարեհ Խրախունին հեղինակ է 26 հատորներու։ Իր գրութիւնները ունին հեզասահ ոճ, առատ բառամթերք ու պատկերներու եւ գիւտերու ճոխութիւն։ Բազմաթիւ գրական մրցանակներու դափնեկիր Խրախունին արժանացած է Ամենայն Հայոց Վեհափառ Հայրապետ Վազգէն Ա․ի կողմէ ՙՍ․Սահակ-Ս․ Մեսրոպ՚ շքանշանին ու սրբատառ կոնդակին, Համազգայինի Անահիտ գրական՚ մրցանակին, ՀԲԸՄի ՙԱլեք Մանուկեան մշակութային՚ մրցանակին, Սփիւռքահայ գրողներու ՙԷլիզ Գաւուքճեան՚ մրցանակին, ՙՀայկաշէն Ուզունեանի՚ գրական մրցանակին, Հայաստանի ՙՄովսէս Խորենացի՚ պատուանշանին, ՙԹուրքիոյ հայոց Պատրիարքարան՚ի շքանշանին եւ 2012ին Հայաստանի պետական բարձրագոյն ՙՍ․Մեսրոպ-Մաշտոց՚ շքանշանին։
Լանան իր երկարամեայ փորձառութեամբ եւ իւրայատուկ բացառիկ ոճով Զարեհ Խրախունիէն զանազան քերթուածներ արտասանեց հիացում պատճառելով ներկայ գրասէր հասարակութեան։ Առաջին առթիւ կարդաց ՙՄաս՚ քերթուածը, ապա արտասանեց ՙԱյս ծառը սուրբ՚ կտորը, ու յետոյ Խրախունիին ՙՊար՚ բանաստեղծութիւնը։ ՀՕՄի Գոլոլեան վարժարանի աշակերտներէն Նենսի Սապունճեան հանդէս եկաւ Խրախունիի ՙՏասնամեայ հանգրուան՚ կտորով։ Յաջորդաբար Լանան հակիրճ տեղեկութիւններ փոխանցեց Խրախունիին ՙԱրի Արքայն՚ դիւցազնավէպի բովանդակութեան մասին եւ մի քանի էջեր կարդաց այդ հատորէն։ Յաջորդաբար ՙՍրտի խօսք՚ գիրքի մասին տեղեկութիւններ փոխանցելով արտասանեց ՙԽօսք սրտի՚ եւ ՙԲոյժ քոյրերուն՚ քերթուածները։
Ներկայ գրասէրներ Զարեհ Խրախունիի գրականութեան մասին շատ լաւ տպաւորուած իրենց գնահատանքը ջերմ ծափահարութիւններով յայտնեցին շնորհաւորելով Լանա Տէր Պետրոսեանը եւ այս որակաւոր ձեռնարկի կազմակերպիչները։