Հայր Մեղրիկին հետ․ ձախին՝ Տէր եւ Տիկին Խաչիկ եւ Այտա Գանձապետեան, աջին Արմենուհի Գոլոլեան եւ Դոկտ․ Իզապէլ Գաբրիէլեան Չըրչըլ
Արմենուհի Գոլոլեան
Սիրելի Սրբազան Հայր,
Մեծ յուզում եւ ցաւ պատճառեց Ձեր վախճանման անսպասելի գոյժը: Ցնցուեցանք եւ տակաւին չենք հաշտուած այս մեծ կորուստին: Յիշողութիւնս զիս տարաւ տարիներ առաջ, երբ Ձեր ներդրումով եւ մեր ընտանիքի աջակցութեամբ Սուրբ Աստուածածին եկեղեցին օժտուեցաւ նոր երգեհոնով մը, որուն համար որքա՜ն ուրախ եւ խանդավառ էիք:
Տարիներով Ձեր եւ Տիկին Լենա Պէյլէրեանի ղեկավարութեամբ, ինչպէս նաեւ Դպրաց Դասի հետ միասին, հոգեւոր շունչով լուսաւորեցիք մեր եկեղեցւոյ զոյգ գմբէթներն ու կամարները:
Դուք, Ձեր բազմազան տաղանդներով, խանդավառեցիք երիտասարդութիւնը, որ աւելիով փարեցաւ մեր եկեղեցոյ հոգեւոր կեանքին: Կորուստը մեծ է եւ հետզհետէ պիտի խորանայ…
Սիրելի եւ յարգելի Սրբազան Հայր, Ձեզ միշտ յիշելու նուէր մը. եկեղեցւոյ հոգաբարձութեան որոշումով, այդ երգեհոնը նուիրուեցաւ Ձեր անմոռանալի յիշատակին որպէս ցայտուն յիշատակներ, որոնք միշտ անմառ պիտի մնան Ձեզ սիրող ու յարգող Թորոնթոհայ գաղութի հոգիներուն մէջ:
Յիշատակդ անթառամ: