Հայաստանէն Առաքուած Մարդասիրական Երկրորդ Օժանդակութեան Առաջին Բաժինը Հասաւ Հալէպ


ՀԱԼԷՊ․ «Գանձասար»․- Փետրուար 19ի առաւօտեան «Հայաստանի Ժողովուրդէն Սուրիոյ Բարեկամ Ժողովուրդին» խորագիրը կրող Հայաստանի Հանրապետութեան մարդասիրական երկրորդ օժանդակութեան առաջին բաժինը հասաւ Հալէպի Ս. Աստուածածին եկեղեցի՝ ռուսական զինուորական բեռնակառքերով։ Օժանդակութիւնները ստանձնեց ՀՀ Հալէպի գլխաւոր հիւպատոս Տիգրան Գէորգեան, ներկայութեամբ փոխհիւպատոս Արմէն Գէորգեանի, Սուրիահայութեան Շտապ Օգնութեան եւ վերականգնումի կեդրոնական մարմնի ներկայացուցիչներ, Վերապատուելի Յարութիւն Սելմիեան եւ Զարեհ Քհնյ. Շաքարեանի, ինչպէս նաեւ Շտապ Օգնութեան Հալէպի գործադիր մարմնի, ազգային իշխանութեան ներկայացուցիչներուն։

Հայաստանէն մարդասիրական օժանդակութիւններու առաքման հսկողութեան համար ներկայ էր նաեւ ՀՀ արտակարգ իրավիճակներու նախարարութեան ներկայացուցիչ Գնդապետ Պաւել Կէօզալեան։

ՀՀ Հալէպի Գլխաւոր Հիւպատոս Տիգրան Գէորգեան յայտնեց, թէ այս օժանդակութիւնը երկրորդն է, առաջինը հասած էր Հոկտեմբեր 2016ին, երկրորդը առաքուած է երկու օդանաւով, առաջին այս բաժինը, որ Լաթաքիա հասաւ Փետրուար 14ին եւ 19ին Հալէպ, կը պարունակէ սննդամթերք ու առաջին անհրաժեշտութեան իրեր։ Երկրորդ օդանաւը եւս Փետրուար 17ին հասած է Լաթաքիոյ Հըմէյմիմ ռուսական ռազմակայան։ Ան կը պարունակէ փոքրերու եւ մեծերու յատուկ հանդերձանք։

ՕԺանդակութեան մէկ մասը բաժնուած է արդէն Քեսապի, Թարթուսի, Լաթաքիոյ, Դամասկոսի մեր համայնքին եւ արաբ ժողովուրդին։ Օժանդութեան Հալէպի բաժինը Շտապ Օգնութեան Գործադիր Մարմնին ճամբով պիտի բաժնուի համայնքի բոլոր կարիքաւորներուն, առանց խտրականութեան, ինչպէս նաեւ ոչ հայ կարիքաւորներուն։

Հայաստանի կառավարութեան որոշումով մարդասիրական այս օժանդակութիւնները շարունակական բնոյթ պիտի ստանան։

Կէօզալեան ըսաւ. «Մարդասիրական օժանդակութեան տրամադրման ընթացքին ես ներկայ եղայ Լաթաքիա, իսկ այժմ Հալէպի Ս. Աստուածածին եկեղեցի։ Քաղաք մտած պահուս իմ վրաս շատ ծանր ազդեց այն հանգամանքը, որ քաղաքը ահաբեկչական յարձակումներու եւ մարտական գործողութիւններու հետեւանքով ենթարկուած է հսկայածաւալ քանդումներու։ Այստեղ ցաւով իմացայ նաեւ, որ զոհերուն մէջ եղած են հայեր եւս։ ՀՀ կողմէ տրամադրուած այս օժանդակութիւնը քայլ մըն է՝ մեղմացնելու Սուրիոյ ժողովուրդին տագնապը»։

Շտապ Օգնութեան Հալէպի Գործադիր Մարմնի անդամ Զեփիւռ Գէորգեան նախ շնորհակալութիւն յայտնեց հայրենիքին, ՀՀ Գլխաւոր Հիւպատոսին եւ նշեց թէ, օժանդակութիւնը քանակի եւ տեսակի համաձայն պիտի բաշխուի Հալէպի բոլոր կարիքաւոր ընտանքիներուն, նկատի պիտի առնուին նաեւ տարիքային բաժանումները։ Օրինակ մը տալու համար ան ըսաւ որ, նախորդ օժանդակութեան ծրարներու մէջ գտնուող վերարկուները բաշխուեցան հալէպահայ բոլոր վարժարաններու աշակերտութեան։