“Արմենփրես։,- Հայոց Ցեղասպանութեան 105-րդ տարելիցին՝ «Դարի Ղօղանջ» բարեգործական հիմնադրամին նախաձեռնութեամբ՝ կը նախատեսուի Ապրիլ 24-ին Ծիծեռնակաբերդի Յուշահամալիրի՝ դէպի անմար կրակ տանող ճանապարհի երկու կողմը տեղադրել 105 հատ”Ռոյալ” մակնիշի դաշնամուր:
Այդ օրը, աշխարհի տարբեր երկիրներէ, Հայաստան ժամանած 105 երաժիշտներ պիտի կատարեն հայ երգահաններու ստեղծագործութիւնները սիմֆոնիկ նուագախումբին նուագակցութեամբ:
«105 Royal» նախագիծին ծանօթանալէ ետք՝ «Հայոց Ցեղասպանութեան թանգարան-հիմնարկի» հիմնադրամի տնօրէն Յարութիւն Մարութեան նախագիծին հեղինակ Արթուր Յովհաննիսեանին յայտնած է, որ կ՝ողջունէ որեւէ ողջամիտ նախաձեռնութիւն, որ Հայոց Ցեղասպանութեան մասին հասարակական հնչեղութեան կ՛ապահովէ:
Ըստ Մարութեանի՝ եթէ «105 Royal» նախագիծը հաւանական դառնայ թանգարան-հիմնարկի ղեկավարութիւնը պիտի չառարկէ, որ դաշնամուրները ժամանակաւոր տեղադրուին յուշահամալիրի տարածքին՝ պայմանով, որ որեւէ վնաս չհասցուի կանաչ գօտիին եւ ընդհանրապէս յուշահամալիրի տարածքին։
Նախագիծի իրականացման պարագային՝ Ապրիլ 25-ի առաւօտեան՝ «Դարի ղօղանջ» բարեգործական հիմնադրամին առաջարկով եւ բարերարներու համաձայնութեամբ՝ դաշնամուրները պիտի նուիրուին Հայաստանի տարբեր քաղաքներու եւ գիւղերու երաժշտական դպրոցներուն: