Սուրիոյ տագնապալի հինգ տարիներուն, հակառակ հերթաբար բազմացող դժուարութիւններուն, Բերիոյ հայոց թեմի Ազգային իշխանութիւնը առաւել յանձնառութեամբ հետամուտ եղաւ կանգուն պահելու ազգային բոլոր կառոյցները եւ յատկապէս` կրթական հաստատութիւնները:
Բերիոյ հայոց թեմի ամբողջ տարածքին, կրթական մեր հաստատութիւնները, ի բացառեալ օրինական իշխանութիւններու հակակշիռէն դուրս մնացած շրջանները, շարունակեցին իրենց նուիրական առաքելութիւնը` յարմարագոյն լուծումներով:
Հալէպի մէջ, ուր կը գտնուի ազգային կրթական հաստատութիւններուն ճնշող մեծամասնութիւնը, ուր եւ տագնապի հետեւանքներու ամբողջ ծանրութիւնը կը տիրէ, մեր յանձնառութիւնը հսկայական ճիգ եւ նիւթաբարոյական ներդրում պահանջեց:
Առաջնորդ սրբազան հօր եւ իրերայաջորդ ազգային վարչութիւններու տնօրինումով, ազգային վարժարաններու աշակերտութեան ծնողներուն ընծայուեցան հնարաւոր դիւրութիւններ` մասնակից դառնալու կրթական գործի շարունակման անհրաժեշտ ծախսերուն:
Մասնաւորաբար Հալէպի ազգային վարժարաններու 2012-2013, 2013-2014, 2014-2015, 2015-2016 ուսումնական տարեշրջանները իրականացան` շնորհիւ ՍՇՕՎՄին, ՀՕՄին եւ «Գ. Կիւլպէնկեան» հիմնարկութեան օժանդակութիւններուն, բայց յատկապէս` նոր հիմնուած Բերիոյ հայոց թեմի «Դպրոց» հիմնադրամին, որ գոյացած է անհատական, հաւաքական, միութենական ու թեմական նիւթական աջակցութիւններով:
Նախագահութեամբ առաջնորդ Շահան արք. Սարգիսեանի, Բերիոյ հայոց թեմի Ազգային վարչութիւնը անցնող ամիսներուն, համընդհանուր քննութեան ենթարկելէ ետք կրթական հաստատութիւններու առաքելութեան անխափան շարունակումը խոչընդոտող խնդիրները, մասնաւորաբար` Հալէպ քաղաքի իրավիճակն ու հետեւանքները, սահմանադրական իր պարտաւորութիւններու եւ յանձնառութիւններու ամբողջական պատասխանատուութեան գիտակցութեամբ կը յայտարարէ 2016-2017 ուսումնական տարեշրջանը Հալէպի ազգային վարժարաններուն համար անվճար:
Ազգային վարչութիւնը իր այս որոշումով թէեւ ծանրագոյն յանձնառութեան տակ պիտի գործէ, սակայն յուսադրուած է, որ հնարաւորութիւն ունեցող մեր ժողովուրդի բոլոր զաւակները պիտի զօրակցին իրեն:
