Ապրիլ 4ին Ամերիկայի Միացեալ Նահանգներուն մէջ տեղի ունեցած են Կլենտէլի Քաղաքային խորհուրդի, Միացեալ կրթական խորհուրդի եւ Համայնքային քոլեճի խորհուրդի ընտրութիւնները:
Քաղաքային խորհուրդի երեք թափուր տեղերուն համար պայքարած են 10 թեկնածուներ, որոնցմէ 4ը հայ` Արա Նաճարեան, Զարեհ Սինանեան, Վրէժ Աղաճանեան, Օննիկ Մեհրապեան (ՀՅԴ Հայ դատի յանձնախումբը պաշտպանած է Արա Նաճարեանի եւ Զարեհ Սինանեանի թեկնածութիւնը): Նախնական տուեալներով` ամենաշատ ձայները հաւաքած են հայ թեկնածուները` Արա Նաճարեան, Զարեհ Սինանեան եւ Վրէժ Աղաճանեան:
Այսպիսով, Քաղաքային խորհուրդի 5 անդամներէն 4ը հայ են, ամենայն հաւանականութեամբ 2017-2018ներուն Կլենտէլի քաղաքապետի պաշտօնը պիտի ստանձնէ Քաղաքային խորհուրդի անդամ Վարդան Կարապետեան:
Քաղաքի քարտուղարի պաշտօնին վերընտրուած է Արտաշէս Քասախեան` հաւաքելով 12,630 ձայն, իսկ Քաղաքի գանձապետի պաշտօնին` Րաֆֆի Մանուկեան` 12,123 ձայնով:
Կլենտէլի Միացեալ կրթական խորհուրդի երեք թափուր տեղի համար պայքարած են 5 թեկնածուներ, որոնցմէ 4ը` հայ (ՀՅԴ Հայ դատի յանձնախումբը պատշտպանած է Կրէկ Գրիգորեանի, Արմինէ Կարապետեանի եւ Շանթ Սահակեանի թեկնածութիւնը): Յաղթող ճանչցուած են`
Արմինէ Կարապետեան, Կրեկ Գրիգորեան եւ Շանթ Սահակեան:
Այսպիսով, Կրթական խորհուրդի 6 անդամներէն 4ը հայ են:
Կլենտէլի համայնքային քոլեճի խորհուրդի ընտրութիւններուն երեք թափուր տեղի համար պայքարած են հինգ թեկնածուներ, որուն երկուքը` հայ (ՀՅԴ Հայ դատի յանձնախումբը պաշտպանած է ընտրութեան հայ մասնակիցներու թեկնածութիւնները): Յաղթող ճանչցուած են` Արմինէ Յակոբեան,Իվեթա Վարդանեան Տէյվիս:
Այսպիսով` Կլենտէլի համայնքային քոլեճի խորհուրդի 6 անդամներէն 3ը հայ են, իսկ նախագահը ազգութեամբ մեքսիքացի:
