«Ազատութիւն».- Հայաստանի պաշտպանութեան նախարարի առաջին տեղակալ Դաւիթ Տօնոյեան «Ազատութիւն TV»ի «Կիրակնօրեայ վերլուծական Հրայր Թամրազեանի հետ» հաղորդման ընթացքին յայտնած է, որ անկախութեան 25ամեակի զօրահանդէսին ցուցադրուած «Իսկանդեր M» հրթիռային համալիրները Հայաստանի Հանրապետութեան սպառազինութիւնն են, որոնք ձեռք բերուած են պետութեան պիւտճէի հաշւոյն£
Ան ընդգծած է, որ Հայաստանի զինուած ուժերը ամբողջութեամբ կը վերահսկեն այդ համալիրներուն՝ աւելցնելով. «Մօտակայ ժամանակ դուք դրանում եւս կը համոզուէք: Այսինքն՝ ոչ կիրառման առումով, պատրաստութեան ծրագրերի առումով»:
«Ռուսական աղբիւրներից մէկում նշուած էր, որ «մեր հայ բարեկամների համար մենք տրամադրել ենք «Իսկանդեր M» տեսակը, որը շուրջ 500 կիլոմետր շառաւղով կարող է խոցել Ադրբեջանի ցանկացած մաս, քաղաք», յայտնած է Տօնոյեան՝ նշելով. «Մեր դաշնակից Ռուսաստանի իշխանութիւնները ռազմատեխնիկական համագործակցութեան շրջանակներում չեն խախտել որեւիցէ հրթիռային տեխնոլոգիաների սահմանափակման կամ համաձայնագրերի որեւիցէ մի կէտ: Այն, ինչ որ մենք ունենք, չի խախտում որեւիցէ համաձայնագիր Ռուսաստանի, նաեւ՝ Հայաստանի պարտաւորութիւն»:
Իսկ «Իսկանդեր M»ի հեռահարութիւնը, ըստ պաշտպանութեան փոխնախարարին, «բաւարար է, որպէսզի խոցուեն հակառակորդի, ցանկացած հակառակորդի կրիտիկական նշանակութիւն ունեցող օբյեկտներ»: «Հայկական Զինուած ուժերում շատ լուրջ վերազինում է իրականացւում, ընթացիկ է այդ վերազինումը», հաստատած է Տօնոյեան:
«Ոչ մի սահմանափակում գոյութիւն չունի Հայաստանի Հանրապետութեան համար ռազմական նշանակութեան արտադրանքի ձեռքբերման, եւ, այսպէս ասեմ, ազատականացուած է այդ շուկան: Ուղղակի գոյութիւն ունեն որոշ սահմանափակումներ Եւրամիութեան անդամ երկրների եւ ՆԱՏՕի անդամ երկրների՝ չմատակարարման կոնֆլիկտային տարածաշրջաններ, որտեղ որ կան ճգնաժամեր եւ այլն», յայտարարած է Դաւիթ Տօնոյեան՝ շարունակելով. «Այդ սահմանափակումներն են, որ որոշակի մեզ, մեր համագործակցութիւնը նեղ միջանցքներում է պահում, այսպէս ասած: Բայց ինչ վերաբերում է Ռուսաստանի հետ կամ ՀԱՊԿ երկրների հետ ռազմատեխնիկական համագործակցութեանը, այդտեղ մենք ամբողջութեամբ ազատ ենք, եւ ես կարծում եմ՝ այն զինտեխնիկայի ցուցադրութիւնը որոշակի նաեւ այնքան էլ համահունչ չի մեր տնտեսական զարգացմանը: Եւ Ռուսաստանը, մասնաւորապէս, կատարում է իր դաշնակցային պարտաւորութիւնները մեր հետ ռազմական տեխնիկայի «առումով»£
«Ադրբեջանական բանակում կան նոր զինատեսակներ, դրանք հիմնականում այդ T-90 տանկերն են, եւ վերջին շրջանում նրանք բաւական մեծ քանակութեամբ զէնքեր են ձեռք բերել: Հիմա, ըստ էութեան, այս նոր հրթիռային համալիրների ձեռքբերումով մենք ունենք առաւելութիւն այդ ամէնի նկատմամբ՝ կարո՞ղ ենք այդպէս ասել», հարցումին ի պատասխան՝ Հայաստանի պաշտպանութեան փոխնախարարը ըսած է. «Մենք խօսում ենք տարբեր մակարդակների վերաբերեալ, այսինքն՝ կայ մարտավարական, օպերատիւ-մարտավարական, ռազմավարական մակարդակի խնդիր: Այն ձեռքբերումները, որոնք Ադրբեջանը այս պահին յագեցուած է այն ռազմական տեխնիկայով, չունի առաւելութիւն մեր նկատմամբ, բայց, եւ ընդհանրապէս, այսօրուայ ռազմարուեստում խնդիրները աւելի շատ լուծւում են մեր զինծառայողների, յատուկ նշանակութեան ստորաբաժանումների բարձր պատրաստուածութեան հաշուին»:
