Յունիս, Յուլիս եւ Օգոստոս 2016ի ընթացքին, Հայաստան-Արցախ ֆոնտը 4.3 միլիոն տոլար արժէքով մարդասիրական օժանդակութիւն հայթայթած է Հայաստանի ու Արցախի բնակչութեան, վեց թռիչքներով եւ տասը ծովային արկղերով:
Սոյն օժանդակութիւնը իրականացնելու համար, Հայաստան-Արցախ ֆոնտը 3 միլիոն տոլար ընդհանուր արժէքով դեղորայք եւ այլ մարդասիրական պիտոյքներ ապահոված է Direct Relief International կազմակերպութենէն (1.4 միլիոն տոլար), Գանատայի Health Partners International կազմակերպութենէն (811,000), AmeriCares կազմակերպութենէն (620,000) եւ Կաթողիկէ Բժշկական առաքելութեան հոգաբարձութենէն (146,000)£
Հետեւեալ կազմակերպութիւնները եւս արժէքաւոր ապրանքներ նուիրած են տուեալ ժամանակաշրջանին.
Prime Healthcare (777,000 տոլար), Ամերիկայի Հայ աւետարանական ընկերակցութիւնը (181,000), Foundation SEMRA Plus, Զուիցերիա (128,000), Project AGAPE (103,000) եւ Հայ որբերու օգնութեան միութիւնը (111,000):
Յունիս, Յուլիս եւ Օգոստոս ամիսներու ընթացքին, Հայաստան-Արցախ ֆոնտին առաքած նպաստները ներառած են մեծապէս անհրաժեշտ դեղորայք՝ քաղցկեղի, սիրտի, աղիքներու եւ մտային հիւանդութիւններու դարմանման համար, ինչպէս նաեւ դեղեր եւ բժշկական պիտոյքներ՝ վերջերս Արցախի դէմ ատրպէյճանական յարձակումներուն պատճառով վիրաւորներուն խնամքին համար: 1 Դեկտեմբեր 2015ին հիմնադրուելէն ի վեր, Հայաստան-Արցախ ֆոնտը 18.5 միլիոն տոլարի արժէքով մարդասիրական օժանդակութիւն հայթայթած է Հայաստանի ու Արցախի բնակչութեան, 20 թռիչքներու եւ 34 ծովային արկղերու միջոցով:
«Հայաստան-Արցախ ֆոնտին կանոնաւորաբար կ՛առաջարկուի միլիոնաւոր տոլարի արժէքով կեանք փրկող դեղեր եւ բժշկական պիտոյքներ», կը յայտնէ Հայաստան-Արցախ ֆոնտի նախագահ Յարութ Սասունեան, աւելցնելով. «Երախտապարտ ենք մեր առատաձեռն բարերարներուն, որոնց թիկունքին շնորհիւ մենք կը շարունակենք անյետաձգելի նպաստներ տրամադրել Հայաստանի եւ Արցախի բժշկական կեդրոններուն»: