Թ․ Տ․
Ընտանեկան հաւաք մը ըլլար կարծես․ հարազատներով, տան մէջ նստած՝ ուրախ-զուարթ, համադամ ուտելիքներ ու գինի սեղանին, իրերայաջորդ երաժշտութիւն ու երգ, իրարու ընդելուզուած ծանօթ ու անծանօթ մեղեդիներ՝ հինն ու նորը միախառն, ծափեր ու պարեր, հակիրճ ընդմիջումներուն՝ տեղ-տեղ զրոյցներ․․․
Այսպիսին էր Համազգայինի “Գլաձոր” մասնաճիւղի կողմէ կազմակերպուած ՙՄիքայէլ Ոսկանեան եւ Ընկերներ՚ (Miqayel Voskanyan & Friends ‘MVF’) երեկոն, 6 Յուլիս 2018ին, Հայ Կեդրոնի սրահէն ներս։ Երեկոյի բացումը կատարեց մասնաճիւղի փոխատենապետ Արա Հասըրճեան։ Հակիրճ ներածականէն ետք, ան կը հրաւիրէ երաժիշտները՝ թառահար եւ երգող Միքայէլ Ոսկանեան, ՙսաքսիֆոն՚ի վրայ Դաւիթ Մելքոնեան, դաշնակահար Արման Փեշթմալջեան, պաս կիթառի վրայ Գուրգէն Ղազարեան, իսկ հարուածային գործիքներու վրայ Մովսէս Ղազարեան։ Կազմուած՝ 2011ին, բազմաթիւ երկիրներ շրջած, հռչակաւոր փառատօներու իրենց մասնակցութիւնը բերած, մրցանակներու դափնեկիր ՙՄիքայէլ Ոսկանեան եւ Ընկերներ՚ը Թորոնթոյի մէջ ահաւասիկ իրենց անդրանիկ ելոյթը պիտի տան․ ծափերու տարափին ներքեւ, դէպի բեմ կը յառաջանան սեւազգեստ երիտասարդները։
Առաջին իսկ կատարումէն կը լսենք երաժշտութեան զանազան ոճեր․ Ժողովրդայինին եկած միացած են ՙրաք՚ը, ՙՖիուժըն՚ը, ՙճազ՚ը․ թառը մուտք գործած է ՙճազ՚ային երաժշտութեան մէջ, մինչ ՙպաս կիթառ՚ն ու ՙսաքսիֆոն՚ը պատշաճեցուած աշուղականին ու դասականին․․․ Ի վերջոյ դուրս կու գայ անակնկալներով լեցուն, նրբաճաշակ ու համահունչ երաժշտութիւն, տեղ-տեղ անհատական կատարումներով, ինչ որ կը յայտնաբերէ իւրաքանչիւր երաժիշտի աստուածատուր տաղանդը։
Սրտամօտ են ի հարկէ Սայաթ Նովան ու Կոմիտասը․ թառը կը տանի մեզ դէպի անցեալ, մինչ հարուածային գործիքներուն ստեղծած արթնութիւնը կը վերադարձնէ դէպի ներկան։ Իսկ երբ Համշէնէն ու Թիֆլիսէն երգեր կը հնչեն, մեծ հետաքրքրութեամբ կ’ունկնդրենք զանոնք․ մեզ քաշողը ոչ միայն իւրայատուկ երաժշտութիւններն են, այլ նաեւ լեզուն։ Քիչ անց, փոթորկոտ երաժշտութիւններուն կը յաջորդէ քնքոյշ ՙԼուսինէ՚ն։
Այնքան նուրբ ՙՄախմուր աղջիկ՚ը ալ աւելի զգայուն ու դիւթիչ կը դառնայ ՙՄիքայէլ Ոսկանեան եւ Ընկերներ՚ու ինքնատիպ կատարումով։
Շնորհաւորելի են կազմակերպողները, համադամ ուտեստեղէնը սիրայօժար տրամադրող արաբերէնով ՙՆուր՚ անունը կրող հաստատութեան սեփականատէր Տէր եւ Տիկ Նազար Չաթալեանները ։ Ձեռնարկի աւարտին,« մինչ կենացները ու շնորհաւորանքները կը շարունակուին, ձայնասկաւառակի վաճառքի սեղանին շուրջ շարքի կեցած ներկաները կը ծանօթանան նաեւ Միքայէլ Ոսկանեանի տիկնոջ՝ Լուսինէի հետ, որուն նեցուկը կը վայելէ խումբը։ Փակագիծ մը բանալով նշենք, որ ձայնասկաւառակներէն օրինակներ տրամադրելի են Համազգայինի Յ․Մանուկեան գրադարանէն։
Ի հարկէ խումբին գնահատականները կը վերապահուին երաժշտագէտ արուեստագէտներու։ Ուշագրաւ է յայտագիրին մէջ ընդգրկուած ստեղծագործութիւններուն այլազանութիւնը, հինէն ու նորէն երաժշտական գործիքներու մէկտեղումը, գործիքները իրենց սովորական բնագաւառէն հեռացնելու եւ այլ երգերու պատշաճեցնելու յանդուգն քայլը ու վերջապէս այն ջերմութիւնը որ կ’արթննայ ունկնդրողին սիրտին մէջ հայրենի, երիտասարդ տաղանդներուներկայութեամբ։