«Ժամանակ»․- Պոլսոյ մէջ Ապրիլի 24ի առթիւ ոգեկոչման արարողութիւններու ծիրէն ներս Թիւնէլի հրապարակին վրայ տեղի ունեցաւ նստացոյց մը։ «24 Ապրիլի ոգեկոչման հարթակ»ին նախաձեռնութեամբ կազմակերպուած սգահանդէսի մասնակիցները 1915ի դէպքերու զոհերը վերյիշեցին՝ տուտուկի յուզումնախառն մեղեդիներու մթնոլորտին մէջ։ Սգահանդէսի կազմակերպիչներուն կողմէ պատրաստուած յայտարարութիւնը ընթերցուեցաւ լրագրող-հրապարակագիր Մուրատ Չելիքքանի կողմէ։ Նորայր Օլկար ընթերցեց այդ թուականին մահուան տարուածներուն անուններն ու ասպարէզները։
Չելիքքանի կողմէ ընթերցուած յայտարարութիւնը կը բովանդակէր 1915ին ապրուածներուն հետ առերեսման կոչեր։ Շեշտուեցաւ, որ ժողովուրդ մը ոչնչացուած է իր ամբողջ մշակոյթով, հուժկու հարուածի մը ենթարկուած է համակեցութեան մշակոյթը։ Հայոց նման ոչնչացուեցան անոնց թողած մշակութային հետքերը։ Հազարաւոր պատմական շէնքեր, եկեղեցիներ ու դպրոցներ փլատակի վերածուեցան գիտակցաբար։ Ըստ յայտարարութեան, վերաբերմունքը եղաւ այնպէս, թէ կարծես այս հողերուն վրայ երբեք չէին ապրած հայերը։ Այս բոլորը, միեւնոյն ժամանակ, սերունդներ շարունակ Թուրքիոյ մէջ առանձնութիւն մը յառաջացուցին։ Յայտարարութեան մէջ կոչ ուղղուեցաւ ներողութիւն խընդրելու՝ առանց սպասելու 103րդ տարելիցին։
Միւս կողմէ, Թիւնէլի հրապարակէն որոշ հեռաւորութեան վրայ նոյն ժամերուն տեղի ունեցաւ նաեւ հակացոյց մը, որու մասնակիցները բողոք յայտնեցին ոգեկոչման արարողութեան դէմ։
Իսկ Պոլսոյ Էլմատաղ շրջանին մէջ կայացած յիշատակի արարողութեան ընթացքին հաւաքի մասնակիցները պարզեցին 235 մտաւորականներու լուսանկարներով ու անուններով պաստառներ, ինչպէս նաեւ` 2007ի սպաննուած Հրանդ Տինքի նկարով պաստառը:
Նախաձեռնութեան հեղինակներու ջանքերով Էլմատաղի մէջ հայ մտաւորականներու պատուին երկու յուշաքար բացուած է: