Միջ յարանուանական պատարագէն պատկեր մը, Ապրիլ 24, Ս. Աստուածածին եկեղեցի, Թորոնթօ:
Մատաթ Բ. Մամուրեան
Չորեքշաբթի, 24 Ապրիլ 2019ի երեկոյեան ժամը 7:30ին, Թորոնթոյի Միջ-յարանուանական յանձնախումբի կազմակերպութեամբ տեղի ունեցաւ Մեծ Եղեռնի ոգեկոչական Սուրբ եւ Անմահ Պատարագ, Ս. Աստուածածին Հայց. Առաք. Եկեղեցւոյ մէջ։
Սուրբ Պատարագը մատուցեց գանատահայոց Փոխառաջնորդ եւ Ս. Երրորդութիւն Հայց. Առաք. Եկեղեցւոյ հոգեւոր հովիւ Զարեհ Ա. Քհնյ. Զարգարեան։ Ս. խորանին սպասարկեցին հայ եկեղեցիներու բարեշնորհ սարկաւագներ։
Շարականներու երգեցողութիւնները ներդաշնակ կերպով կատարուեցան եկեղեցիներու դպրաց դասերուն կողմէ, ղեկավարութեամբ՝ Անուշ Գալստեանի, նուագակցութեամբª Սոնա Արթինեանի։ Դասին մէջ ներկայ էին Գեղարդ Ծ. վրդ. Քիւսպէկեան՝ Առաջնորդական փոխանորդ եւ հոգեւոր հովիւ Ս. Աստուածածին եկեղեցւոյ, Եղիա Ծ. վրդ. Քիրէջեան՝ հովիւ Հայ Կաթողիկէ Ս. Գրիգոր Լուսաւորիչ եկեղեցւոյ, Տ. Հարոլտ Նահապետեան՝ Անկլիքան եկեղեցւոյ հովիւ, օրուայ բանախօս՝ Միհրան Ճիզմէճեան (Հայ Աւետարանական եկեղեցի), Միջ-յարանուական Մարմնի ատենապետ Յակոբ Ճանպազեան, ինչպէս նաեւ եկեղեցիներու ներկայացուցիչներ եւ մեծ թիւով հաւատացեալներ։
Ս. Պատարագի աւարտին տեղի ունեցաւ բարեխօսական արարողութիւն։
Օրուան բանախօս Միհրան Ճիզմէճեան իր՝ ՙՄեծ Եղեռնը եւ Մենք՚ նիւթով բանախօսութեան ընթացքին ըսաւ. ՙՔանի մը օրեր առաջ Յիսուսի չարչարանքներուն, խաչելութեան եւ հրաշափառ Յարութեան տօնը նշեցինք։ Այսօր հաւաքուած ենք մեր յարգանքի տուրքը տալու սրբադասուած Մեծ Եղեռնի մեր նահատակներու անմահ յիշատակին, հաւատալով որ ՙՄահ Իմացեալ Անմահութիւն է՚։ Մեծ Եղեռնը մեր ժողովուրդին համար եղաւ համազգային աննախընթաց աղէտ մը։ Սփիւռքի թէ Հայրենիքի մէջ չկայ հայ մը, որ մօտէն կամ հեռուէն կրած չըլլայ 20րդ դարու առաջին այս ցեղասպանութեան հետեւանքները՚։
Բանախօսը իր խօսքը վերջացուց հետեւեալ մտքով․ ՙՄեր նահատակներուն կտակին հաւատարիմ մնալու համար պէտք է մոռնանք մեր մեծ ու փոքրՙես՚երը, ՙկողմ՚երը եւ անհատական շահերը, փարելով միայն հոգեկանին՚։
Գեղարուեստական բաժինով հանդէս եկաւ Թորոնթոյի ՙՆայիրի՚ երգչախումբը, ղեկավարութեամբ՝ Վազգէն Գալճեանի, դաշնակի ընկերակցութեամբ՝ Սոնա Յովսէփեանի, ներկայացնելով ՙՏէր Զօր՚« ՙԹողՀնչեն Շեփոր՚ երգերը։
Շնորհակալական եւ փակման խօսքով հանդէս եկաւ Գեղարդ վրդ. Քիւսպէկեան։ Եղիա Ծ. վրդ. Քիրէջեանի ՙՊահպանիչ՚ով ձեռնարկը իր աւարտին հասաւ, որմէ ետք ներկաները հետեւելով թափորին, հոգեւորակններուն հետ ուղղուեցան Նահատակաց Յուշարձան, ուր զետեղեցին մեխակներ։
Աւարտին, եկեղեցւոյ ՙՅովնանեան՚ ներքնասրահին մէջտեղի ունեցաւ հիւրասիրութիւն։