Վարանգաթաղի Բարձունքին

 

Ձօն՝  Քրիստափոր Արթինի, Գէորգ Հաճեանի եւ Մհեր Յարութիւնեանի 

 

Վարանգաթաղի բարձունքը սրբացաւ,

Ձեր սուրբ կարմիրով մկրտուեցաւ,

Ձեր վերջին շունչերը արտաբուրելով՝ 

Հայըն իր փառքին տիրացա՛ւ :

 

Համբարձա՛ք, դուք չինկաք,

Իբրեւ յաղթանակի նախերգակ,

հովիտներու քամիներուն հետ՝

Թէժ պայքարէն ետք, բարձրացաք:

 

Վարանգաթաղի արծիւներու երամ,

Սէգ բարձունքէն՝ Վասպուրական,

Չէք ննջեր, միշտ կը տքնիք արթո՛ւն,

Հաւատարիմ պահակներ դիւցազներուն:

 

Ձեր անունները յաւերժ, աղօթքի պէս՝ 

Սերունդներ կ’արտասանեն այնպէս,

Ինչպէս սուրբերուն միջնորդութեան.

Դո՛ւք առաքինի ընծաներ  Հայութեան:

 

 

Թորոնթօ, Գանատա

2020