Հայարի քհնյ. Թանաշեան
Գանատահայոց Թեմի Առաջնորդ Աբգար Եպս. Յովակիմեանի հայրական օրհնութեամբ` Կիրակի, 4 Օգոստոս 2019-ին, Ս. Երրորդութիւն Եկեղեցւոյ մէջ պատարագեց եւ քարոզեց Եկեղեցւոյ Հոգեւոր Հովիւի նորանշանակ Օգնական Հայարի Քհնյ. Թանաշեան:
Ս. Պատարագի ընթացքին Գանատահայոց Թեմի Փոխառաջնորդ եւ Եկեղեցւոյս Հոգեւոր Հովիւ Զարեհ Ա. Քհնյ. Զարգարեանը ընթերցեց Սրբազան Հօր տնօրինութիւնը` Հայարի քհնյ. Թանաշեանի նշանակման առնչութեամբ: Տէր Զարեհը իր ուրախութիւնը յայտնեց այս նշանակման առթիւ եւ յանուն Եկեղեցւոյ Ծխական Խորհրդի, Յարակից Մարմիններու եւ հաւատացեալներու, բարի գալուստ եւ յաջողութիւններ մաղթեց Տէր Հօր ի փառս Աստուծոյ, Անոր Սուրբ Եկեղեցւոյ պայծառութեան եւ հաւատացեալներուն մատուցած իր ծառայութեան մէջ:
Յաւարտ Սուրբ Պատարագի, հաւատացեալները շնորհաւորեցին Տէր Հայրը, որմէ ետք տեղի ունեցաւ բարի գալստեան մտերմիկ ընդունելութիւն` կազմակերպուած Ծխական Խորհուրդին կողմէ, գլխաւորութեամբ ատենապետուհի Տիկ. Ռոզին Իմաստունեանի: Ընդունելութեան ընթացքին ներկաները յաջողութիւններ մաղթեցին Տէր Հօր իր այս նոր առաքելութեան մէջ: