Կ՛ուզէ՞ք նորաձեւութեան հետեւիլ, անհրաժեշտ արդուզարդ, վարակէն պաշտպանուելու առարկաներ պէտք ունի՞ք, ուրեմն ի՞նչ կը սպասէք` կրնաք այցելել «Covid 19-ի Վերաբերեալ Անհրաժեշտ Իրեր» խանութը, ուրկէ կրնաք ապահովել ձեր ուզածն ու չուզածը:
Այս օրերուն ձեր ուզածը շատ յստակ է, իսկ չուզուած իրերուն ցանկը շատ երկար է, զանոնք գուշակելը ձեզի կը ձգեմ:
***
– Չորս ամիսէ ի վեր մատնայարդարի երես չեմ տեսած, շատ խղճալի է վիճակս:
– Քառասուն տարեկան եղայ ու միայն նշանտուքիս եւ պսակիս մատնայարդարի երես տեսայ:
Է՜հ, որո՞ւն վրայ մեղքնամ, շուարեցայ:
***
– Հայրենիք ճամբորդելը մոռցանք այս տարի:
– Շատերը նախկին տարիներու նկարները ու video-ները դիտելով կը մխիթարուին:
– Հաւատացէ՛ք, որ Հայաստանի մեր հայրենակիցները ձեզմէ աւելի տխուր են: Առանց սփիւռքահայութեան ամառ անցընե՞լ: Տէ՛, եկո՛ւր ալ դիմացիր:
***
Քորոնայէն առաջ.
– Տղա՛ս, կը բաւէ տունը նստիս ու cell phone-իդ մէջ մտնես: Ե՛լ, ակումբ գնա՛, պարախումբի, երգչախումբի կամ մարզանքի դասընթացքներու մասնակցի՛ր: Facebook-ին ու Instagram-ին գերին դարձար: Ե՛լ, կը բաւէ:
Քորոնայի օրերուն.
– Տղա՛ս, մէկու մը հետ չտեսնուի՛ս, տեղ չերթա՛ս, ընկերներուդ հետ չհամախմբուի՛ս, ակումբ կամ դպրոց չերթա՛ս: Գնա՛, նստէ՛ ու cell phone-իդ մէջ ինկի՛ր, հաճի՜ս:
***
– Վերարկուներս լուացի ու արեւին տակ չորցնելէ ետք վերցուցի: Ի՛նչ դիւրին եղաւ:
– Ինչո՞ւ նախորդ տարիներուն առանց լուալու կը վերցնէիր:
– Չէ՛, ճա՛նս, չոր մաքրումի համար հարիւրաւոր տոլարներ կը ծախսէի:
– է՜հ, քորոնային բարիքները:
***
– «Աչքը սրտին հայելին է», կ’ըսեն:
– է՛հ, լաւ որ քիթը կամ բերանը չէ, թէ ոչ հայելին ծածկած պիտի պտըտէինք այս տարի:
***
– Մասքով նկարուիլը վերջին նորոյթն է:
– Բայց մասքով եթէ նկարուիս ժպիտդ չի տեսնուիր:
– Ո՞վ ըսաւ, որ մասքդ բերնիդ վրայ պիտի ըլլայ:
– Հապա՞:
– Մասքդ դէպի կզակդ պիտի իջեցնես ու ժպտելով նկարուիս:
– Է՛հ, մասքէ մօրուքով նկարուիլը նորոյթ է ըսէ, որ առաջին վայրկեանէն հասկնամ:
***
2020-ը մատներ ու լեզուներ աշխատցնելու տարի է, որովհետեւ կոճակ սեղմելով ու հեռաձայնին վրայ խօսելով աշխատողներու կամ պարզապէս չաշխատողներու տարի է:
***
– Մասքդ վար իջեցուցեր ես, որ մաքուր օդ շնչե՞ս:
– Դուն ալ մասքդ վեր հանած ես, որ հանգիստ խօսի՞ս:
– Այս ձեւով վարակէն պիտի պաշտպանուի՞նք:
– Չէ՛, վարակին գլուխը պիտի դարձնենք:
***
– Ինքնաշարժին մէջ մինակ էիր, բայց մասք դրած էիր:
– է՜հ, քորոնան օդին մէջ է եղեր:
– Ինքնաշարժիդ պատուհաններն ալ գոց էին:
– Աս քորոնան շատ պզտլիկ է, կրնայ ըլլալ, որ տեղ մը պահուըտած է: Ես առաջք կ’առնեմ միշտ:
– Ուրեմն տան մէջ ալ մասքով կը պտըտիս:
– Անշո՛ւշտ: Անով ալ կը քնանամ: Այս քորոնան միշտ արթուն է ու որս մը կը փնտռէ:
Մեր այս բարեկամը օր մը խեղդամահ պիտի ըլլայ ու` ՙքորոնայի վախով գնաց խեղճը՚, պիտի ըսենք:
***
– Ո՞ր տարին առողջութեան իսկական արժէքը գիտցանք եւ բոլորս հաւասարեցանք ու մէկ պայքար մղեցինք:
– 2020-ին:
– Ո՞ր տարին շատ մը մոռցուած, բայց անհրաժեշտ զգացումներու տեղ տուինք:
– 2020-ին:
– Ո՞ր տարին ընտանիքի յարգը աւելիով գիտցանք:
– 2020-ին:
– Ո՞ր տարին պատերազմներու մասին չլսեցինք:
– 2020-ին:
Է՜հ, չկայ չարիք` առանց բարիքի: