«Թորոնթոհայ»,- Մեծի Տանն Կիլիկիոյ կաթողիկոսութեան միաբանութիւնը կը յայտնէ միաբանութեան աւագ անդամներէն Մեղրիկ եպս. Բարիքեանի վախճանումը։
Տասն օր «քորոնա» ժահրին դէմ անդուլ պայքար մղելէն ետք Տ. Մեղրիկ սրբազանը Յունուար 16-ի առաւօտեան վախճանեցաւ։ Ան ծնած է 1968-ին, Պէյրութ։
2020-ի Օգոստոսին Մեծի Տանն Կիլիկիոյ կաթողիկոս Արամ Ա․ի պաշտօնագիրով նշանակուած էր Զարէհեան Դպրեվանքի տեսուչ:
Սրբազանը զանազան պաշտօններ վարած է Կաթողիկոսարանէն ու Դպրեվանքէն ներս. եղած է Դպրեվանքի հսկիչ, դպրապետ եւ լուսարարապետ Մայր Տաճարի, Տեսուչ Թռչնոց Բոյնի եւ խմբավար Շնորհալի երգչախուբմին։ Վեհափառ Հայրապետին տնօրինութեամբ, ան ուսանած է Պոսէյի (Զուիցերիա) աստուածաբանական հիմնարկէն ներս, ինչպէս նաեւ երաժշտական յատուկ դասընթացքներու հետեւած Նիւ Եորքի մէջ։
2002-ին նշանակուած է Թորոնթոյի հոգեւոր հովիւ, իսկ 2014-2016 եղած է Գանատայի Հայոց Թեմի Առաջնորդ։
Երաժշտական բարձր ուսում ստանձնած Տ. Մեղրիկ Սրբազանը տարբեր առիթներով եւ մեծ յաջողութեամբ դրսեւորած է իր սէրն ու հմտութիւնը Հայաստանեայց Առաքելական եկեղեցւոյ շարականագիտութեան եւ երաժշտական ոլորտներուն մէջ։
Եղած է ուսուցիչ, խմբավար եւ ձեռնահասօրէն կարողացած է դառնալ իր շրջապատին մէջ սիրուած եւ յարգուած միաբան։
Նշենք, որ այսօր ի լոյս հանգչած Տ. Մեղրիկ Սրբազանին վերջին օծման եւ թաղման արարողութիւնը պիտի կատարուին վաղը ՝ Յունուար 17-ին, Անթիլիասի Մայրավանքին մէջ։
Խունկ եւ աղօթք անոր յիշատակին։