Մեղիկ Եպս․ Բարիքեան եւ Լենա Պէյլէրեան
Լենա Պէյլէրեան
Թուականը 2002. հազիւ երկու տարի էր, որ ստանձնած էի Ս. Աստուածածին եկեղեցւոյ Կրտսերաց Դպրաց Դասի ղեկավարութեան պաշտօնը` այն օրերուն հոգեւոր հովիւ’ Շահէ Ծ. Վրդ. Փանոսեանի եւ օրուայ հոգաբարձութեան ատենապետ Ռաֆֆի Տէր Պօղոսեանի խնդրանքով. Շաբաթ օր մը, երբ եկեղեցի հասայ Դպրաց դասի փորձի եկեղեցւոյ շրջաբակին մէջ դիմացս ելաւ թեմիս նախկին բարեջան Առաջնորդ Խաժակ Սրբ․ Արք․ Յակոբեանը եւ հետս մի քանի վարկեան զրուցելէ ետք ինծի յայտնեց, թէ գաղութը պիտի օժտուի նոր հոգեւոր հովիւով մը՝ յանձինս Մեղրիկ Ծ․ Վրդ․ Բարիքեանի։ Սրբազանը մեծ խանդավառութեամբ ինծի տեղեկացուց Հայր Սուրբին երաժշտական գիտելիքներուն եւ ձիրքին մասին եւ ըսաւ «Շատ հաճոյք պիտի առնես իրեն հետ աշխատելով»։
Սրբազանին հետ հանդիպումէս կարճ ժամանակ ետք, շաբթուան մէջ օր մըն էր, Հայր Շահէն հեռաձայնեց ինծի եւ խնդրեց, որ գրասենեակ իր մօտ երթամ ծանօթանալու համար քաղաքս ժամանած նոր հոգեւոր Հովիւին՝ Հայր Մեղրիկին հետ։ Առաջին հանդիպումը Հայր Սուրբին հետ ոտքի վրայ շատ կարճ տեւեց եւ Հայր Մեղրիկին իմ վրաս ձգած առաջին տպաւորութիւնը, իր երկար մօրուքով, եղաւ, որպէս խիստ անձնաւորութիւն մը, սակայն կարճ ժամանակ ետք արդէն բարեկամացած էինք։
Իմ պաշտօնս էր ամիսը 3 անգամ փորձ եւ մէկ Կիրակի Պատարագի երգեցողութիւն Կրտսերաց Դպրաց Դասին հետ՝ որպէս ղեկավար։ Հայր Սուրբը մօտէն կը հետաքրքրուէր մեր կրտսերներու աշխատանքով, կը քաջալերէր զիս եւ կը խրախուսէր փոքրերը, որոնց այնքան կը սիրէր։ Ամէն փորձի անպայման վեր կու գար եկեղեցի, անուշ խօսք մը ըսելու փոքրերուն, երբեմն ալ կատակելու եւ գնահատելու իրենց Աստուածահաճոյ ծառայութիւնը եկեղեցիին։ Հայր Սուրբին գրասենեակը միշտ լեցուն էր շաքար-շոքոլայով եւ փոքրերը շատ կը սիրէին փորձէն ետք իրեն այցելել եւ իրեն հետ ժամանակ անցնել։
Այսպէս մի քանի տարի հազիւ անցած, 2006-ին, Հայր Մեղրիկը ձեռնարկեց ձայնագրել տալ փոքրերու Եկմալեան Պատարագի երգեցողութիւնը՝ երկու ձայնով: Ապա 10 հազար օրինակ հրապարակելով ձրիաբար տարածեց աշխարհասփիւռ հայ մանուկներուն ունկնդրութեան հաճոյքին համար, որպէսզի անոնց նաեւ հրաւիրէր սիրելու եւ երգելու Պատարագը։
Ամէն աշխատանք իրեն հետ այնքան դիւրին եւ հեզասահ կ’ընթանար, կը զարմանայի, որովհետեւ այնքան սէր եւ հաւատք կար իր աշխատանքին մէջ։
Հայր Սուրբը շատ կը սիրէր Պատարագի երգեցողութիւնը ըլլայ Եկմալեան, Կոմիտասեան կամ Խորէնեան․ զանազան ժամերգութիւններ’ Հռիփսիմեանց եւ Գայանեանց, առաւօտեան եւ երեկոյեան, Մեծ Պահքի Արեւագալի եւ Հսկումի արարողութիւնները, Աւագ Շաբթուան մասնայատուկ արարողութիւնները, Աւագ Հինգշաբթի եւ Աւագ Ուրբաթ օրերու հոգեպարար արարողութիւնները, Քրիստոսի Թաղման թափօրը, Տաղաւար տօներու Պատարագները, Աստուածածնայ ուխտի Շաբթուայ աղօթքի պահերը, Խաչի մեծահանդէս Անդաստան Թափօրը։ Ինք մասնաւորաբար կը սիրէր Մեծ Պահքի Կիրակիներու առաւոօտեան ժամերգութիւնները իրենց զանազան շարականներով եւ կը հրաւիրէր, որ ժողովուրդը գար եկեղեցի վայելելու եւ ըմբոշխնելու այդ բոլոր հոգեպարար արարողութիւնները։
Մենք մի քանի տիկիններ միշտ կ’ուզէինք մասնակցիլ այդ յատուկ ժամերգութիւններուն՝ օրհնութիւններ տանելով մեր տուները։
Երեքշաբթի օրերուն, երբ Տարեցները կը հաւաքուէին ակումբին մէջ, Հայր Սուրբը կ’ուզէր, որ անոնք նախ գան եկեղեցի, աղօթքի պահ մը ապրին, ապա անցնին իրենց հաւաքին․ դժբախտաբար միայն մի քանի տարեցներ կը մասնակցէին։ Մենք 8-10 տիկիններ 12 տարիներ շարունակ վայելեցինք Երեքշաբթի օրուայ այդ աղօթքի գեղեցիկ սովորութիւնը, որուն շնորհիւ մեր առօրեան աւելի հեզասահ եւ խաղաղ կ’ընթանար։
Այսպէս Հայր Մեղրիկին հետ իմ աշխատանքի ծիրս օր ըստ օրէ կ’ընդլայնէր եւ ես մեծ հաճոյքով տարիներ շարունակ մասնակցութիւնս բերի՝ ամէն առիթի, որ Հայր Սուրբը խնդրէր աջակցութիւնս երաժշտական գետնի վրայ։
Սրբազանը շատ կը սիրէր Խորէնեան “Ամէն եւ Ընդ Հոգւոյդ Քում»ը։ Առիթով մը, երբ խնդրեց, որ երգեմ ըսի «Կը ներես Հայր Սուրբ, բայց նօթան հետս չէ»։ Հայր Սուրբին պատասխանը եղաւ՝ «Ինչպէ՞ս կրնաս պատերազմի դաշտ իջնել առանց զենքի»: Այնուհետեւ՝ բոլոր նօթաներս եկեղեցին պահարանին մէջ կը պահէի, որպէսզի յանկարծ զինք յուսախաբ չընեմ։ Այլ խօսքով, կ’ուզէր, որ միշտ պատրաստ եւ կատարեալ ըլլանք, հաւատքով լեցուն՝ ծառայելու առանց ընկրկումի։ Ինք կը հաւատար, որ ամէն Պատարագ կամ արարողութիւն չարին դէմ պատերազմ էր եւ մենք պէտք էր, որ միշտ յաղթական դուրս գայինք։
Կը յիշեմ, տարի մը, երբ եկեղեցին եւ ներքնասրահը նորոգութեան մէջ էին եւ մենք Մեծ Պահքի շրջանի մէջ էինք, առաւօտ մը Արեւագալի ժամերգութեան համար, երբ եկեղեցի հասանք, չէինք գիտէր, թէ ուր պիտի կատարենք ժամերգութիւնը: Հայր Սուրբը մեզ առաջնորդեց ներքնայարկը խոհանոցին մուտքի փոքր բաժինը, ուր շարած էր աթոռներ եւ շարժուն երգեհոն մը բերած եւ մենք այդ նեղ պայմաններուն մէջ 15-20 հոգի չզրկուեցանք աղօթքի այդ պահէն։
Ինք բացառիկ հաւատքով լեցուն այնպիսի հոգեւորական մըն էր, որ երբեք չէր խնայեր ոչ մէկ առիթ բարձրացնելու համար իր աղօթքն առ Աստուած, ինչ որ մեզ բոլորս մեծապէս կը ներշնչէր։
Սրբազանը մեծ ուշադրութիւն կը դարձնէր երիտասարդներուն եւ պատանիներուն եւ սիրով կը փորձէր զանոնք առաջնորդել դեպի եկեղեցի, կը տառապէր անոնց համար եւ իր հաւատքի կեանքը որպէս հայելի անոնց առջեւ կը դնէր, որպէսզի ուղղէ զանոնք եւ առաջնորդէ դէպի Աստուած, դէպի աղբիւրը լոյսին։
Երբ հանդիպէր նոր տաղանդաւոր երիտասարդի մը, թափ եւ զարկ կու գար անոր աճումին եւ զանազան առիթներ կը ստեղծէր զայն ծանօթացնելու գաղութին եւ երգահանդէսներ ու նուագահանդէսներ կազմակերպելով՝ յաջողութեան կը հասցնէր զայն:
Մեծ պատրաստութիւն կը տեսնուէր Տաղաւար տօներուն, նամանաւանդ Ծնունդին, Զատկին եւ Աստուածածնայ տօներուն առթիւ. եկեղեցին եւ շրջափակը կը զարդարուէր միտքէ վեր՝ Հայր Սուրբին իսկ գաղափարներով: Ամէն տարի տարբեր ձեւով․ կը յիշեմ. տարի մը Ծնունդին, եկեղեցիէն ներս ժայռերու վրայէն հոսող ջուրի տեսարան մը ունէինք, ուր նաեւ մսուրը զարդարուած կ’ըլլար եւ այս բոլորը կ’ընէր եկեղեցի յաճախող ժողովուրդին եւ հաւատացեալներուն հաճոյքին համար, որպէսզի անոնք ուրախանային եւ ապրէին Ծնունդի խորհուրդը եւ հոգին։
Մայրերու եւ Հայրերու տօներուն առթիւ Հայր Սուրբը նորութիւն մը եւս սկսաւ. Պատարագէն ետք, եկեղեցւոյ մէջ միատեղ երգել մայրերու եւ հայրերու ձօնուած աշխարհիկ երգեր, որոնք կը յուզէին ինչու չէ նաեւ կ’ուրախացնէին ներկաները։
Ինչպէ՞ս կրնամ մոռնալ մեր երաժշտական համերգները, անոնց փորձերն ու ձայնագրումները․հրաշքի համազօր ձեռնարկներ էին, անհաւատալի բայց իրաւ: Հսկայ աշխատանք մը, զոր Հայր Սուրբը ամենայն համբերութեամբ եւ կատարելութեամբ կ’իրականացնէր։ Անգամ մը, կը յիշեմ ելոյթէ մը երկու շաբաթ առաջ, դերակատարները տակաւին չէին գիտէր, թէ ինչ պիտի ընեն բեմին վրայ․ մտահոգուած, երբ իրեն կը դիմէի, ինծի կը հանդարտեցնէր ըսելով՝ «Ամէն բան լաւ կ’ըլլայ, Լենա՛, մի՛ մտահոգուիր»: Եւ, իսկապէս, այդպէս կ’ըլլար, կարծես գերբնական ոյժ մը կար, որ կը հսկէր իր ամէն աշխատանքներուն վրայ։
Մեր բոլոր համերգներուն երաժշտութիւնը ինք կը դաշնաւորէր։ 2009-ին Հայր Սուրբին փափաքով եւ կարգադրութեամբ ձայնագրեցինք 18 շարականներ, գանձեր եւ տաղեր իր իսկ դաշնաւորումով կամ պատշաճեցումով․ շարականներ, որոնք հազուադէպօրէն կ’երգուէին ինչպէս օրինակ՝ «Ուստի Բուրելով», Գիւտ Խաչի շարականը, Սահակ Ձորափորեցի 7-րդ դար, «Լոյս Լուսոյ Մայր» շարական Աւագ Ուրբաթի, Սուրբ Մովսէե Խորենացի 5-րդ դար, «Սայլն այն Իջանէր», «Գանձ Յարութեան», Սուրբ Գրիգոր Նարեկացի 10-րդ դար եւ այլն։
Խտասալիկին (CD) հրապարակման առթիւ, Ս․ Աստուածածնայ տօնին, Սրբազանը կազմակերպեց բացօթեայ բացառիկ շնորհահանդէս մը` հոծ բազմութեան ներկայութեան։
Այս աշխատանքը Սրբազանին հետ մեծ հաճոյք եւ պատիւ էր անձիս, որուն համար այնքան շնորհակալ եւ երախտապարտ եմ իրեն։ Ինծի համար պիտի մնայ անմոռանալի յիշատակ մը իրմէ։
Սրբազանը բացառիկ համեստ եւ խոնարհ հոգեւորական մըն էր, երբեք չէր պարծենար իր գիտելիքներով եւ առատօրէն կը բաշխէր բոլորին, իր աղօթքի զօրութեամբ չէր հպարտանար: Ընդհակառակը՝ երբ առիթով մը իրմէ յատուկ աղօթք խնդրեցի «Սուրբերու աղօթքը թող հասնի» ըսաւ։ Ուրիշ առիթով մը, երբ Պատարագի համար կը զգեստաւորուէր, շրջապատուած երիտասարդ Սարկաւագներով՝ այս արտայայտութիւնը ունեցաւ. «Երբ Պատարագի կը մտնեմ, այնպէս մը կը զգամ թէ այդ իմ առաջին Պատարագն է եւ նաեւ կրնայ վերջինը ըլլալ եւ ըստ այնմ հոգեպէս ինքզինքս կը պատրաստեմ»։
2014-ին, երբ լուրը հասաւ, թէ Հայր Սուրբը Եպիսկոպոս պիտի ձեռնադրուի, որքան որ ուրախ էինք իր կրօնական աստիճանի բարձրացումով, նոյնքան տխուր էինք, որովհետեւ պիտի կորսնցնէինք զինք։
12 տարիներ կեանք մըն էր, զոր ապրեցանք Սրբազանին հետ, ուրախացանք իր հետ եւ ինչու չէ երբեմն ալ տխրեցանք։ Յիշատակները բազմաթիւ են եւ անմոռանալի: Մեծ եղաւ իր հետքը Թորոնթոյի գաղութին վրայ: Կատարեալ, մեծ սիրտ ունեցող հոգեւորական մը, որուն հոգիին մէջ ամէն մէկուս համար յատուկ տեղ կար։
Թող Աստուած լուսաւորէ իր բարի հոգին եւ թող Իր կամքը Օրհնեալ ըլլայ: Հողը թեթեւ գայ իր վրայ. Ննջէ խաղաղ, բարի եւ անզուգական Մեղրիկ Սրբազան։