Արցախը կրկին պիտի վերածնուի, պիտի յառնի փլատակներէն ու պիտի շարունակէ իր յաւերժական ընթացքը, ֆէյսպուքեան իր էջին վրայ գրած է Արցախի նախագահ Արայիկ Յարութիւնեան։
Ան մասնաւորապէս գրած է․
«Սիրելի՛ հայրենակիցներ, 1988 թուականի Փետրուար 20-ը հայ ժողովուրդի տարեգրութեան մէջ մտած է որպէս ազգային ոգիի վերազարթօնքի, կուռ միասնականութեան ու անկոտրում կամքի խորհրդանիշ, որպէս պայքարի ու մաքառման, վերակերտման ու արարման, կորուստի ու յաղթանակներու ամբողջ ժամանակաշրջանի մը սկիզբը:
Այդ օրէն անցած է 33 տարի: Այսօր արցախահայութիւնը կ’ապրի իր պատմութեան ամենաբարդ ու ծանրագոյն շրջափուլերէն մէկը, կ’ապրի` ճակատագրի հարուածներէն կծկուած ու բուռ մը դարձած, ցաւէն ատամները ու բռունցքը սեղմած, ճիչը կոկորդին եւ արցունքը աչքերուն մէջ անթեղած:
Կ’ապրի` իր մէջ վառ պահելով 88-ի ոգին ու գաղափարները, ա՛լ աւելի վստահ ու հաստատակամ, որ իր ընտրած ուղին ճիշդ է ու անշրջելի, որ, առաւել քան երբեւէ, այսօր ինքը պիտի ապրի ու շէնցնէ հայրենի հողը, որ կրկնակի սրբացած է իր նորօրեայ հերոսներու արեամբ:
Եւ յանուն մեր նահատակներուն, մեր երազանքներուն ու սերունդներուն` Արցախը կրկին պիտի վերածնուի, պիտի յառնի փլատակներէն ու պիտի շարունակէ իր յաւերժական ընթացքը: Մենք պարտաւո՛ր ենք շարունակելու Արցախեան շարժման արժէքաբանական պայքարը եւ ըլլալու աւելի ուժեղ, աւելի զարգացած, կուռ ու միաբան` վճռականօրէն պաշտպանելով մեր իրաւունքներն ու ազատութիւնները, ազգային շահերն ու արժէքները, պատիւն ու արժանապատուութիւնը:
Սա է հայ ժողվուրդի յարատեւման ճանապարհը: Եւ թո՛ղ այդ ճանապարհին խաղաղութիւնն ու յաջողութիւնը ուղեկցին մեր ժողովուրդին ու հայրենիքին», գրած է նախագահ Յարութիւնեան: