Արդիւնաբեր տարեշրջանի մը ակնկալիքով վերամուտի պատրաստուեցան հայեցի դաստիարակութիւն եւ գիտութիւն ջամբող Թորոնթոյի հայկական ամենօրեայ եւ շաբաթօրեայ վարժարանները, սակայն համավարակին բերումով` 2020-2021 տարեշրջանը կը տարբերի նախորդներու սովորական դրութենէն:
Այս առիթով, «Թորոնթոհայ» կապուեցաւ ՀՕՄի Ամէնօրեայ Վարժարանի, Ս. Սահակ եւ Ս. Մեսրոպ Ազգային Շաբաթօրեայ Վարժարանի, ինչպէս նաեւ Ս. Գրիգոր Լուսաւորիչ Հայ Կաթողիկէ Շաբաթօրեայ Վարժարանի տնօրէնութեանց հետ՝ տեղեակ ըլլալու համավարակէն պաշտպանուելու անոնց որդեգրած նոր քայլերէն, ձեռնարկած փոփոխութիններէն ու մշակած նոր ծրագիրներէն:
Ստորեւ կը ներկայացնենք տնօրէնութեանց ներկայացուցած հաղորդագրութիւնները.
ՀՕՄի Ամենօրեայ Վարժարանի Վերամուտը
Այս տարի աննախնթաց տարի մըն է մեր վարժարանին համար: Ընդհանրապէս այսպիսի պայմաններու տակ պէտք չենք ունեցած վարժարանին դռները բանալու: Համավարակը բաւական բաներ փոխեց կրթական ծիրէն ներս եւ մենք մեր կարգին պէտք էր աշխատէինք այդ ուղղութեամբ ու մեր նահանգի պայմանները նկատի առնելով ու կատարեալ աշխատանք տանելով լաւագոյնս տրամադրել մեր աշակերտներուն:
Մեր աշակերտներուն համար ապահով եւ յարմարագոյն միջավայր մը ստեղծելու համար դպրոցի կրթական մարմինը, ուսուցչական կազմը եւ տնօրէնութիւնը ձեռք-ձեռքի տալով աշխատանք տարին եւ ճիգ չխնայեցին, որպէսզի ճիշդ ձեւով, կատարուած փոփոխութիւններով պատրաստուինք Սեպտեմբեր ամսուան վերամուտին, ինչպէս նաեւ բաւական գումարներ ծախսուեցան, որպէսզի կարենանք այս առթիւ մեր աշակերտներուն պէտքերը հայթայթել:
Ապահովութեան տեսակէտով, իւրաքանչիւր սենեակի եւ անցքի մէջ հականեխիչ դեղեր զետեղուեցան, որպէսզի դասարան մտնող կամ ելլող աշակերտները հականեխեն իրենց ձեռքերը: Կրկնապատկած եւ բարելաւած ենք դպրոցի շէնքի օդի շրջանառութեան համակարգը եւ զտիչներու յաճախակի փոփոխութիւնը: Հիւանդապահ մը ապահոված ենք (երկրորդ հիւանդապահ մըն ալ պիտի ապահովենք), որպէսզի երկու շէնքերէն ներս ունենանք այս արհեստավարժ ներկայութիւնը ու անոնք օգտակար դառնան առաւօտեան դպրոց յաճախող աշակերտներուն առողջութեան ստուգման, համավարակի ախտանշաններ ցոյց տուողները կամ մտահոգիչ պարագաները նշեն ու որոշեն, թէ ո՞ր աշակերտը կրնայ դպրոց մտնել եւ որ մէկը տուն վերադառնալու կարիքը ունի: Հիւանդապահը կ’աշխատի մեր կազմին հետ եւ կրթական ծիրէն ներս: Ան ցուցմունքներ կու տայ աշակերտներուն, ինչպէս` կրած դիմակապերու ճիշդ ձեւով դնելն ու հանելը, իրարմէ հեռաւորութիւն պահելը, ձեռքերը լուալու եւ հականեխելու գործընթացը:
Դարձեալ, ապահովութեան հետ կապուած, ծնողները ամէն առաւօտ մեզմէ կը ստանան Text massage մը, ուր յիշուած է, որ անոնք պէտք է ստուգեն իրենց զաւկին առողջական վիճակը եւ վստահեցնեն, որ վարակի որեւէ նշաններ չունի ան եւ վերջին 14 օրերու ընթացքին շփում չէ ունեցած որեւէ վարակակիր անձի հետ: Բոլոր հարցումներուն պատասխանը «Ո՛չ» ըլլալու պարագային անոնք կրնան դպրոց գալ, իսկ մէկ «Այո»ի պարագային` տուն կը մնան եւ կը խնդրուի անոնցմէ, որ դիմեն իրենց բժիշկին: Այսպիսով, Self Screening Application-ով, ծնողքը մեզի տեղեակ կը պահէ իր զաւկին առողջական վիճակը:
Այս տարի բարելաւած ենք դպրոցին լուացարանները, որպէսզի աշակերտը առանց որեւէ մէկ բանի դպնալու օգտագործէ զանոնք: Առողջապահական եւ տեղեկատուական պաստառներ տեղադրած ենք պատերուն վրայ (առողջապահական քայլերը ճիշդ ձեւով պահել խրախուսող), ինչպէս նաեւ նշաններ զետեղած ենք գետինը, որպէսզի աշակերտը գիտնայ, թէ ո՞ր ուղղութեամբ պէտք է քալէ եւ ո՞ր դռները պէտք է գործածէ:
Մաքրութեան յաճախականութիւնը կրկնապատկած ենք երկու շէնքերուն մէջ, օրուան ընթացքին, բոլոր ընդմիջումներէն եւ ճաշի ժամերէն առաջ ու վերջ կը մաքրուին ու կը հականեխուին անոնք:
Մէկ այլ եւ նոյնքան կարեւոր` առցանց դասաւանդման միջոցները զարգացնելու ուղղութեամբ պատրաստուեցաւ դպրոցս: Վերջին տարիներուն այս աշխատանքին լծուած էինք եւ լաւ արդիւնքներու հասած էինք արդէն, երբ Մարտէն ի վեր առցանց դասաւանդեցինք աշակերտներուն: Այդ ընթացքին դպրոցը Chromebook-եր ապահովեց 6-էն 8-րդ դասարանի աշակերտներուն եւ նախապէս անոնց գործածած IPad-ները փոխանցեցինք 4-րդ եւ 5-րդ դասարանցիներուն: Հիմա 4-րդէն մինչեւ 12-րդ դասարանի բոլոր աշակերտները համակարգիչ կամ IPad ունին եւ զանոնք կ’օգտագործեն դասարանէն ներս, ինչպէս նաեւ տան մէջ:
Տունէն դասաւանդման յետեւողներուն համար այնպիսի դրութիւն ստեղեծինք, որուն հիման վրայ դասաւանդող ուսուցիչը դպրոցէն live stream-ի միջոցաւ, առցանց, պիտի դասաւանդէ` տունը մնալ նախընտրող աշակերտին, միեւնոյն ժամանակ դպրոց յաճախող աշակերտներուն:
Այս տարեշրջանին զանազան օրէնքներու փոփոխութիւններ եղած են դպրոցէն ներս: Իւրաքանչիւր բաժանում չի կրնար շփում ունենալ այլ բաժանումի աշակերտներու հետ: Աշակերտին ապահովութեան ու ֆիզիքական հեռաւորութիւնը պահպանելու համար բակերուն մէջ գիծեր քաշած ենք, որպէսզի զբօսանքի ժամանակ բաժինները իրարմէ հեռու մնան: Դպրոցին բոլոր դասարանները ու սենեակները կ’օգտագործուին ներկայիս: Անհանգիստ եղող կամ հիւանդութեան որեւէ ազդանշան ցոյց տուող աշակերտներուն համար ալ կայ առանձին սենեակ մը` Isolation room, ուր զետեղուած են հականեխիչ դեղեր, դիմակապեր, ձեռնոցներ եւ մաքրելու ու հականեխելու դեղեր (այս յիշածներս իւրաքանչիւր դասարանի մէջ կայ արդէն, որպէսզի հարկ եղած պարագային ուսուցիչները կամ աշակերտները օգտուին անոնցմէ):
Աշակերտներուն ժամանումը եւ մեկնումը աւելի հեզասահ դարձնելու նպատակով դիմած ենք զանազան միջոցներու: Այդ միջոցներու որդեգրման նպատակով հսկայ ջանք կը թափեն ուսուցիչներն ու ծնողները: Վրան մը զետեղած ենք դուրսը, ուրկէ առաւօտեան ծնողքը մեզի կը յանձնէ իր զաւակը, իսկ մեկնումի պահուն դարձեալ հոնկէ կը ստանձնէ իր զաւակը:
Շնորհակալութիւն կը յայտնեմ ուուցչական կազմին, որ իսկապէս ճիգ չխնայեց լաւագոյն ձեւով պատրաստուելու վերամուտին եւ շինիչ ու հոգատար ձեւով մօտեցաւ մեր աշակերտներուն, որպէսզի անոնք կարենան պատրաստուիլ նոր օրէնքները կիրարկելոու եւ մնան ապահով: Իսկապէս շատ գնահատելի է ուսուցիչներուն ճիգը եւ յատուկ ծրագիրներով ու նոր միջոցներով դասաւանդման պատրաստուելու աշխատանքը: Յոյժ գնահատելի է վարժարանիս կրթական մարմինին տարած աշխատանքները: Անոնք, ամիսներ շարունակ, մեծ զոհողութիւններ կրեցին եւ աշխատանքի լծուեցան` լաւագոյն ձեւով ու միջոցներով պատրաստուելու վերամուտին եւ մեր վարժարանին դռները բանալու ծնողներուն եւ աշակերտներուն դէմ:
Բարի վերամուտ եւ յաջողութեամբ լի ապահով տարեշրջան:
ՀՕՄի Ամենաօրեայ Վարժարանի Տնօրէն` Ռաֆֆի Սարգիսեան
Ս. Սահակ եւ Ս. Մեսրոպ Ազգային Շաբաթօրեայ Վարժարան
Ս. Սահակ եւ Ս. Մեսրոպ Ազգային Շաբաթօրեայ Վարժարանի 65-րդ ուսումնական տարեշրջանը կը սկսինք «Կա՛նք, պիտի լինե՛նք, ու վերադառնա՛նք» համոզումով
Կազմ ու պատրաստ ենք վերամուտին. Վերամուտ մը, որ անսովոր ըլլալով հանդերձ, նաեւ զմայլելի է, ի գործ դրուած ճիգով ու ջանքով:
Վարժարանի անձնակազմը, ծնողներն ու աշակերտները յանդուգն եւ հաստատամիտ քայլերով պատրաստ են դիմագրաւելու ներկայ համատարած մարտահրաւէրը դպրոցներէն ներս:
Վերամուտի սովորական հրճուանքին հետ միատեղ կը դիմակայենք դասաւանդութեան ձեւի (հեռակայ կամ ֆիզիքապէս ներկայ) անորոշութեան ճնշուածութիւնը: Սակայն, կը յարատեւենք հարթել խոչընդոտներով լեցուն մեր ուղին եւ կը շարունակենք մեր աշխատանքը, ստեղծելու համար ուսուցման դրական միջավայր` տան թէ դպրոցին մէջ հաւասարապէս, առիթ տալով մեր երեխաներուն, որ զարկ տան իրենց կարողութիւններուն, առաջ տանելով իրենց հետաքրքրութիւններն ու խոր սէրը ուսման հանդէպ:
Հոս կը յիշեմ Կոստան Զարեանի խօսքը. «Հայ ըլլալը անգութ խնդիր է եւ հերոսական ձեռնարկութիւն: Այդ պատուիրան է, առաքելութիւն եւ ճակատագիր, որը պատմութիւնը մեզ դրած է դարերու խորքից: Մենք լոյսի եւ խաւարի միջեւ պայքարի ցնցող զօրքերն ենք … Եւ մենք պարտադրուած ենք ահաւոր պատասխանատուութեան տակ»:
Հայ լեզուն եւ մշակոյթը փոխանցելը մեր պարտականութիւնը, ազգային պարտքը, եւ բարձրագոյն առանձնաշնորհումը կը սեպենք, ուստի ժամանակայատուկ ձեւով կը շարունակենք մեր ծրագիրը: Մեծ ճիգերով կը ստեղծենք հաճելի միջավայր մը, ուր աշակերտները կը սորվին խանդավառութեամբ ու կը զարգացնեն իրենց հետաքրքրութիւնն ու սէրը հայկական ժառանգութեան հանդէպ:
Այս տարի եւս պիտի շարունակենք գործակցիլ Թորոնթօ Շրջանի Ուսումնական Խորհուրդին (Toronto District School Board) հետ` օգտուելով անոնց Google Classroom հարթակէն, ինչպէս նաեւ պիտի սկսինք համագործակցիլ AVC եւ VLUME հաստատութիւններուն հետ, որոնք մասնագիտացած են առցանց հայ լեզուի դասաւանդութիւններու կապակցութեամբ: Նոր պատասխանատուութիւններ վերցնելով, Շաբաթօրեայի անձնակազմը հնարաւոր ամէն միջոցի կը դիմէ յարմարելու նոր իրավիճակին վերակարգաւորելով Հայերէն դասաւանդելու նուիրական աշխատանքը` ստեղծագործ ոգիով, զոհաբերութեամբ, եւ յամառ աշխատանքով:
Մանկապարտէզէն մինչեւ 8-րդ դասարաններու աշակերտները պիտի վերադառնան իրենց 2020-2021 տարեշրջանի առցանց դասարանները` 3 Հոկտեմբերին:
– Առցանց դասընթացքները անվճար են:
– Դէմ առ դէմ առցանց դասաւանդութիւնը տեղի պիտի ունենայ Շաբաթ առաւօտ, 30-40 վայրկեան, որուն պիտի յաջորդէ աշակերտին կողմէ կատարուելիք առանձին աշխատանք, ինչպէս նաեւ ուսուցիչին հետ հաղորդակցութիւններ` Google Classroom-ի եւ Ե-նամակի միջոցաւ, մօտաւորապէս երկու ժամ:
– Շաբաթօրեայի թուականներն են. Հոկտեմբեր 3, 17, 24, 31, Նոյեմբեր 7, 14, 21, 28, Դեկտեմբեր 5, 12, 19
– Արձանագրութիւնները կ’ըըլան TDSB-ի International Languages ծրագրի տակ` https://ereg.tdsb.on.ca/public/ilelogin.aspx
– Երկրորդական դասարաններու (credit courses Level 1 and Level 2) արձանագրութիւնը կ’ըլլայ TDSB-ի Continuing Education Program for High Schools https://www.tdsb.on.ca/High-School/Going-to-High-School/Night-School-and-Summer-School/Saturday-Credit-Program միջոցաւ:
Մնանք հանդարտ եւ լաւատես, հաստատ հաւատքով թէ կա՛նք ու պիտի լինե՛նք:
Դոկտ. Արփի Փանոսեան Մըթարթ
Ս. Սահակ և Ս. Մեսրոպ Ազգային Շաբաթօրեայ Վարժարանի Տնօրէն
Ս. Գրիգոր Լուսաւորիչ Հայ Կաթողիկէ Շաբաթօրեայ Վարժարանի Վերամուտը
Հովանաւորութեամբ Գեր. Հայր Եղիա Ծ. Վրդ. Գիրէջեանի, Ս.Գրիգոր Լուսաւորիչ Հայ Կաթողիկէ Շաբաթօրեայ Վարժարանը մեծ ուրախութեամբ դռները կը վերաբանայ ընդունելու համար աշակերտները իրենց հայեցի դաստիարակութիւն ապահովելու: 2020-2021 ուսումնական տարեշրջանի վերամուտը տեղի պիտի ունենայ Շաբաթ, 3 Հոկտեմբեր 2020-ին, սակայն տարբեր հանգամանքներով:
Մարտ ամսուն, երբ վարժարանիս կրթական տարեշրջանը կ’ընթանար հեզասահ եւ բնականոն պայմաններու մէջ, ուսուցչական կազմը, պաշտօնէութիւնը եւ աշակերտութիւնը միասնաբար մեծ խանդավառութեամբ անցած էին նախապատրաստական աշխատանքներու՝ նշելու վարժարանիս հիմնադրութեան 40-րդ տարեդարձը: Ամէն ինչ կիսատ մնաց Քորոնա ժահրի (Covid-19) պատճառով:Ուսումնական տարեշրջանը դադրեցաւ կարճատեւ ընդմիջումով մինչեւ Մայիս: Նախարարութեան կողմէ հրատապ կարգադրութեամբ վարժարանը վերստին սկսաւ իր աշխատանքը, սակայն այս անգամ` առցանց «virtual»: Ուսուցիչները մնացեալ ուսումնական տարեշրջանը աշակերտներուն մատուցեցին օգտաշատ ցուցմունքներ, պարտականութիւններ, օգնութիւն եւ աջակցութիւն, որպէսզի ուսումնական տարեշրջանը հասնի իր արդիւնաբեր աւարտին:
Այս տարի, Կրթական Նախարարութեան եւ Թորոնթօի Կաթողիկէ Շրջանի Դպրոցներու Խորհուրդարանի (TCDSB) կողմէ սահմանած կանոններու եւ որոշումներուն համաձայն` Ս. Գրիգոր Լուսաւորիչ Հայ Կաթողիկէ Շաբաթօրեայ Վարժարանը առցանց «virtual» կերպով պիտի շարունակէ իր առաքելութիւնը: Ծրագիրը կը ներկայացուի 30 դասընթացքներով, իւրաքանչիւրը 2 ժամ տեւողութեամբ. Դասընթացքը կը սկսի 3 Հոկտեմբեր 2020-ին մինչեւ 19 Յունիս 2021: Այս տարի եւս արձանագրութիւնները պիտի ըլլան Կաթողիկէ Կրթական Խորհուրդի կայքէջին միջոցաւ (www.tcdsb.org/intlang):
Վերջին 4 շաբաթներու ընթացքին ուսուցիչները անցած էին լայնածաւալ վերապատրաստման եւ նախապատրաստական աշխատանքներª աշակերտներուն արդիւնաբեր եւ բովանդակ ուսուցման հարթակ ապահովելու: «Google Classroom»ի եւ «Google Meet»ի օգտագործման միջոցոներով ուսուցիչները պիտի կարողանան աշակերտներուն ուսուցանել դասասենեակի առցանց պայմաններ, ուր աշակերտները եւ ուսուցիչները կրնան տեսնել զիրար. այդ մէկը աւելի տպաւորիչ պիտի դարձնէ իւրաքանչիւր դասը: Ուսուցիչները իրենց կարելին պիտի ընեն օգտաշատ ցուցմունքներով օգնելու եւ աջակցելու աշակերտներուն` ծանօթացնելու իրենց մեր հարուստ մշակոյթին, աւանդութիւններուն, երաժշտութեան, գրականութեան` արուեստի հարթակի միջոցով: Ուսուցիչնները` ինչպէս միշտ, իրենց կարելին ըրած են տալով աշակերտին լաւագոյնը, այս տարի եւս պիտի շարունակեն իրենց սրբազան առաքելութիւնը ոչինչ չտարբերելով նախորդ տարիներէն:
Ինչ կը վերաբերի Ս. Գրիգոր Լուսաւորիչ Հայ Կաթողիկէ Երկրորդական Վարժարանի դասընթացքներուն, որ մօտաւորապէս քարորդ դար պատմութիւն ունեցող` ՀԱՅԵՐԷՆ լեզուի եւ գրականութեան «Քրէտիդ Գորս»ի դասընթացքները, դարձեալ պիտի շարունակուին առցանց: Անցնող տարեշրջանին 18 Մարտ 2020-ին անսպասելի ու անակնկալ պատահած համաճարակի պատճառով, 10-րդ, 11-րդ, եւ 12-րդ դասարաններու դասընթացքները շարունակուեցան` առցանց եւ մեծ յաջողութեամբ վերջ գտան մինչեւ ամառուան արձակուրդը:
Այս տարի եւս, անհաճոյ ու տագնապալիօրէն շարունակուող համաճարակի պատճառով` աշակերտութեան առողջութիւնը անվտանգելու սիրոյն դասընթացքները պիտի շարունակուին առցանց, ուստի կը խնդրուի աշակերտներէն, անոնք որոնք հետաքրքրուած են, անմիջապէս արձանագրուին` երթալով www.tcdsb.org/continuingeducation կայքէջքը, որպէսզի ապահոված ըլլան, 17 Հոկտեմբեր 2020-ի առաւօտեան ժամը 9:00-ին, 2020-2021-ի ուսումնական տարեշրջանի դասընթացքները, ապահովելու նաեւ իրենց Հայերէն Լեզուի Երկրորդական դասարաններու «Քրէտիթ»ները, որոնք հետեւեալ օրէնագրութեամբ են, 10-րդ LYRBU1-01, 11-րդ LYRCU1-01, 12-րդ LYRDU1-01:
2020-2021-ի ուսումնական տարեշրջանը պիտի կատարուի առցանց, սակայն վարժարանիս վսեմ առաքելութիւնը կը մնայ միեւնոյնը` ուսուցանել, խթանել պաշտպանել եւ պահպանել հայոց լեզուն` ուսուցման, մշակութային իրազեկման եւ աւանդութիւններու տօնակատարութեան միջոցաւ:
Անհամբեր կը սպասենք մեր մշտական աշակերտներուն, ինչպէս նաեւ նորեկներուն: Կը հաւատանք, թէ մենք` ուսուցիչներս, տնօրէնութիւնը, աշակերտութիւնը եւ յարգելի ծնողները միասնաբար համագործակցելով կ’ունենանք յաջող եւ օրհնաբեր ուսումնական տարեշրջան:
Բարի եւ Առողջ Վերամուտ
Տնօրէնութիւն`
Ս. Գրիգոր Լուսաւորիչ Հայ Կաթողիկէ Շաբաթօրեայ Վարժարանի