Մայր Աթոռ Ս․Էջմիածինի տեղեկատուական համակարգի տնօրէն Վահրամ քհն․Մելիքեան Sputnik Արմենիային հետ հարցազրոյցի ընթացքին յայտնած է, որ Ազպէյճանի բռնագրաւած արցախեան տարածքներուն մէջ եկեղեցիներու և վանքերու պահպանման համար ինչ քայլեր կ՚առնուին։ Ան միաժամանակ պատմած է` ինչպէս յաջողեցան պահել Դադիվանքը։
Բռնագրաւուած և Նոյեմբեր 9-ի համատեղ յայտարարութեամբ յանձնուած տարածքներուն մէջ մնացին Արցախի թեմի շուրջ 130 պատմական և նորակառոյց վանքեր և եկեղեցիներ, որոնց մէջ 4-7 դարու նշանաւոր սրբավայրեր, հազարաւոր խաչքարեր։ Հնարաւոր չեղաւ դուրս բերել նոյնիսկ եկեղեցական պարագաները, սրբանկարները և այլն։
Վահրամ քահանայ կը պատմէ նաեւ, թէ ինչպէս փրկուեցաւ Դադիվանքը, վկայելով. «Երբ նոյեմբեր 9-ի համատեղ յայտարարութեամբ յստակ դարձաւ, թէ որ տարածքները պիտի յանձնուէին Ազրպէյճանին, ակնյայտ էր, որ շարք մը մեր պատմական տաճարներուն հետ նոյն ճակատագիրին պիտի արժանանայ նաև ճիշդ սահմանին գտնուող Դադիվանքը՝ արցախահայութեան համար կարևորագոյն այս ուխտատեղին։
«Այս մտահոգութեամբ և վտանգի տակ յայտնուած գործող վանքը փրկելու նպատակով Ամենայն Հայոց Հայրապետը դիմեց իր հոգևոր եղբօրը՝ Մոսկուայի և Համայն Ռուսիոյ պատրիարք Կիրիլ Ա.ին՝ վանքի հոգևոր առաքելութեան պահպանման գործին մէջ զօրակցութիւն բերելու համար։ Այսպիսով՝ Դադիվանքը ևս դարձաւ բանակցութիւններու առարկայ։ Արդիւնքով՝ շնորհիւ Կիրիլ պատրիարքի միջնորդական ջանքերուն` հնարաւոր եղաւ արձանագրել պատմական Դադիվանքի այսօրուան կարգավիճակը։ Անձամբ Ռուսաստանի նախագահ Վլատիմիր Փութինի ցուցումով՝ ռուսական խաղաղապահ ուժերու ղեկավարութեան կողմէ վանքին անվտանգութեան ապահովման նպատակով տեղակայուեցաւ խաղաղապահներու առանձին յենակէտ»։