Բեմադրիչ Անի Հովհաննէսեան
Բեմադրիչ եւ արտադրող, ինչպէս նաեւ «ԹելէՆայիրի» եւ «Հորիզոն» պատկերասփիւռի յայտագիրներու հաղորդավար Անի Յովհաննէսեանի, պատկերասփիւռի համար արտադրած իր բազմաթիւ տեսանիւթերու կողքին, բեմադրած է շարք մը մրցանակներու արժանացած վաւերագրական ֆիլմ մը` The Hidden Map («Ծածուկ Քարտէսը»): Թորոնթոյի Համազգայինի «Նուռ» ֆիլմի 14-րդ փառատօնի մրցանակաբաշխութեան ընթացքին, Արեւմտեան Հայաստան կատարած այցելութիւններուն հիման վրայ նկարահանուած եւ սկովտիացի հնագէտ Սթիւըն Սիմի հետ շարունակուող ճանապարհորդութիւնը ներկայացնող Անի Յովհաննէսեան-Գէորգեանի ֆիլմը մրցանակի արժանացաւ:
Օրին, մեր թղթակից Տիրուկ Մարգարեան Կարապետեան ստորեւ տրուած հետաքրքրական հարցազրոյցը ունեցաւ Անի Յովհաննէսեանի:
Հ -Ձեր ֆիլմը «Նուռ» ֆիլմի փառատօնին ընթացքին թորոնթոհայ հանդիսատեսի կողմէ ընտրուեցաւ, որպէս յիշատակութեան արժանի վաւերագրական ֆիլմ: Իմացանք, որ ձեր տարեդարձն է այսօր եւ տարեդարձի լաւագոյն նուէրը ըլլալու է այս մրցանակը: Զգալի էր ձեր յուզումն ու ուրախութիւնը, եկէք խօսինք ձեր զգացումներուն մասին:
Պ-Շատ ուրախ կը զգամ եւ հպարտ եմ, ո՛չ միայն ինձմով, այլեւ` հանդիսատեսով, որ Արեւմտեան Հայաստանը ներկայացնող այս վաւերագրական ֆիլմը դիտեց եւ գնահատեց մեր աշխատանքը: Հպարտ եմ իրենցմով, որովհետեւ այս մէկը ինծի ցոյց տուաւ, որ մեր ժողովուրդն ալ կը զգայ, թէ այս հարստութիւնը մեզի կը պատկանի, եւ մեր պատմական հողերը, անոնց վրայի շինութիւնները եւ մամիկներուն ու պապիկներուն կեանքի պատմութիւնն ու զոհողութիւնը չմոռցուեցան եւ անոր փաստը մենք ենք, մենք, որ այսօր հոս ենք: Այս մրցանակը ստացած պահուս զգացուած էի, որովհետեւ մեր միջեւ գոյութիւն ունեցող կապը եւ ֆիլմի նկարահանման ժամանակ զգացածներս կրցայ փոխանցել հանդիսատեսին:
Հ -Գետեմ, որ երկար տարիներու ծրագիր էր ձեր նկարահանած ֆիլմը, ինչպէ՞ս ընթացան նկարահանումները եւ ինչպիսի՞ արկածախնդրութիւններէ անցաք այդ ընթացքին:
Պ- Այո՛, տարիներու ծրագիր ունի այս ֆիլմը: Ես արտադրող եմ ու կը սիրեմ աշխատանքս, բայց ամէն ինչ մէկդի ձգեցի, որովհետեւ գիտէի, որ մեր պատմութիւնը պէտք է ձեւով մը պատմեմ: Երբ 2012-ին, հօրս հետ առաջին անգամ գացի Արեւմտեան Հայաստան եւ տեսայ մեր կառոյցները ու շինութիւնները եւ շօշափելով զանոնք` կապի զօրութիւնը զգացի: Յաջորդ տարի դարձեալ գացի եւ երեւելի հայերով հարուստ շրջան մը եղող Կեսարիոյ հին հայկական տան մը մէջ (քանի մը հայկական տուներ կան հոն, որոնք մինչ օրս որոշ չափով իրենց բուն դիմագիծը կը պահեն) ծանօթացայ հնագէտ Սթիւընին, որ մանրամասնութեամբ կը դիտէր, կը պրպտէր ու կը նկարէր հնութիւնները: Յայտնի էր, որ հայ չէր, բայց շատ հետաքրքրուած էր մեր աւերակներով ու գանձերով: Ծանօթացանք եւ պարզուեցաւ, որ ինք երեսուն տարիներէ ի վեր կը պրպտէ ու կը վաւերացնէ մեր հարստութիւնները: Այդ ծանօթացումէն ետք սկսանք միասին քալել այս ֆիլմին ճանապարհով: Նկարահանումներու ընթացքին ինքնաշարժ մը վարձեցինք, մեզի հետ էին քանի մը հոգի` ընկերուհի մը, նկարահանող երիտասարդ մը եւ անշուշտ թարգմանիչ մը: Անշուշտ մէկու մը չյայտնեցինք, որ կը նկարահանենք, բայց իմ քամերաս միշտ բաց էր եւ ամէն մանրամասնութիւն նկարելու ու ձայնագրելու պատրաստ: Երբ կը խօսէի մարդոց հետ, ի յայտ կու գար, որ շատ հայեր կային հոն: Մարդիկ սկսան համարձակիլ եւ ըսել, որ իրենց մեծհայրերը կամ մեծմայրերը հայեր էին, մանաւանդ Տիգրանակերտի եւ Մուշի մէջ: Տիգրանակերտի մէջ 14-րդ դարէն մնացած, եօթը խորան ունեցող, Ս. Կիրակոս եկեղեցին կար, որ քաղաքապետին ջանքերով վերանորոգուած ու բացուած էր, հոն սկսան գալ իբրեւ քիւրտ կամ թուրք ապրած, սակայն հայու ծագում ունեցող հայեր: Հոն էր, որ կարծես վերածնունդ եղաւ: Դժբախտաբար, դարձեալ գոցեցին այդ եկեղեցին եւ հոն ապրող ծագումով հայերուն համար շատ դժուար եղաւ այդ պարագան:
Հ- Ինչպիսի՞ մղումով սկսած է Սթիւըն Սիմի` Արեւմտեան Հայաստանի ուսումնասիրութեան գաղափարը: Հայկական մշակոյթը պահպանելու իմաստով ի՞նչ աշխատանքներ կատարած է մեր ազգի բարեկամ հնագէտը:
Պ- Երբ ծանօթացանք, գիտցայ թէ ինքը 30 տարիներէ ի վեր մեր աւերակները կ’ուսումնասիրէ եւ չի սիրեր մարդոց հետ հաղորդկցիլ, մինչդեռ ինծի համար հնութիւնները յայտնաբերելու չափ կարեւոր են մարդոց հետ խօսիլը: Մեր աւերակները իրեն համար անգին են եւ իր հոգին կու լայ, երբ կը տեսնէ, թէ հնութիւն մը տարուէ-տարի կը քանդուի, որովհետեւ զանոնք պաշտպանող չկայ: Ամէն տարի կու գայ ու կը նկարէ եւ կը վաւերացնէ զանոնք, ինքը ձեւով մը մեր աւերակներուն սիրահարը եղած է, մանաւանդ Անիի աւերակներուն: Ան իր կեանքը նուիրած է այս աշխատանքին: Ուսանողական շրջանին պէտք էր medieval architecture-ի (միջնադարեան ճարտարապետութեան) ուսումնասիրութիւն ընէր եւ լսած էր, որ Արեւելեան Թուրքիոյ մէջ կային հին շինութիւններ: Երբ գնաց տեսնելու եւ պրպտելու, տեսաւ, թէ հրաշալի շինութիւններ կան հոն` Արեւմտեան Հայաստանի եւ մանաւանդ Անիի մէջ, ուր 150 անգամ այցելած է: Ես շատ կը յարգեմ իր նուիրումը, որ անշահախնդիր է: Սթիւընը, մարդոց հետ առանց շփուելու իր գործը կատարած է տարիներ շարունակ եւ այսպիսով իր կեանքի գոհացումը կրցած է գտնել եւ հայ ազգին գանձերն ու հնութիւնները նկարել: Ան թիւով 100,000 եւ աւելի նկարներով վաւերական փաստերու վերածած է մեր հնութինները եւ տարուէ-տարի անոնց նահանջը կամ քանդումը արձանագրած եւ ներկայացուցած է աշխարհին:
Հ -Ֆիլմի ընթացքին շատ զգացական պահեր կային, որոնցմէ մէկը շատ յուզեց հանդիսատեսը. Բազմաշէն գիւղին մէջ, անցեալէն գտնուած մատանի մը յանձնեցին ձեզի եւ այդ մատանին անցուցիք ձեր մատը: Այդ յուզիչ պահուն մասին կ’ուզէի զրուցել:
Պ- Մեծ հայրիկիս` Գասպար Յովհանէսեանի բնօրրանն է Բազմաշէնը. գիւղ, ուր բազմաթիւ հայկական տուներ կային ու այսօր ո՛չ մէկ հայու տուն կայ հոն: Երբ մեծհօրս մասին կը խորհէի եւ իր ապրած տեղին հետքերը կը փնտռէի ու կը մտածէի, թէ հիմա բան մը չմնաց, յանկարծ տուներէն մէկուն մէջ հայկական կուժի մը կոթը գտայ, ետքը գիւղացին ցոյց տուաւ այդ մատանին ու ես մատիս անցուցի եւ երեւակայութեան գիրկը ինկայ: Մտածեցի, թէ արդեօք ո՞վ, ի՞նչ առիթով եւ ինչպիսի՞ զգացումով կրած էր այդ մատանին: Այդ իրերը իրենց մէջ կը կրեն իրենց տէրերուն հոգին: Ամէն առարկայ իր պատմութիւնը ունի, իսկ մարդը, որ այդ հարստութիւններուն տէրն էր, կ’ապրի այսօր մեր մէջ: Հեռաւորութիւնը պէտք չէ մեզի հեռացնէ մեր անցեալէն, հողէն ու պատմութենէն: Իսկապէս, որ ես ամէն երկվայրկեան կը զգամ մեր նախահայրերուն ներկայութիւնը մէջս եւ վստահ եմ, որ բոլորս ալ նոյն զգացումը ունինք եւ այդպէս ալ պիտի շարունակենք մնալ մինչեւ որ ամբողջ աշխարհը իմանայ մեր իսկական պատմութիւնը:
Հ – Տարիներ առաջ Արեւմտեան Հայաստան չէինք երթար, իսկ վերջերս ուխտագնացութիւններ կը կազմակերպենք: Որպէս պահանջատէր պէտք է երթանք եւ ցոյց տանք թուրքերուն, որ հայոց նոր սերունդը չէ մոռցած Էրկիրը ու պահանջատէր է: Ի՞նչ կը կարծէք, արդեօք ի՞նչ դրական ազդեցութիւն ունի Արեւմտեան Հայաստան երթալն ու բնօրրանին մօտէն ծանօթանալը:
Պ – Պահանջելէն առաջ հայը պէտք է իմանայ, թէ ի՞նչ ունէինք հոն եւ ի՞նչ կորսնցուցինք: Հայ սերունդներուն կ’ուզեմ ըսել, թէ «Մի՛ կարծէք, թէ ասիկա մեռած պատմութիւն է, այլ ողջ պատմութիւն է: Մենք պէտք է հպարտ զգանք, որ մեր նախնիները կառուցեցին այդ քաղաքները, գիւղերը, զարմանալի կամքով եւ ոյժով շինուած հրաշալի վանքերը, եկեղեցիներն ու դպրոցները: Մենք պէտք է երթանք եւ կապը զգանք անոնց եւ մանաւանդ ժողովուրդին հետ, որոնք մեր արիւնը ունին եւ տակաւին կ’ապրին մեր պապենական հողերուն վրայ եւ քաջութիւնը ունին խոստովանելու իրենց հայութիւնը: Չձգենք, որ իրենց պատկանելիութիւնը մեռնի իրենց մէջ, այլ երթանք եւ իրենց ոյժ տանք: Այս ամէնը ընենք իսկական քայլերով եւ ո՛չ թէ երեւակայութեամբ: Փառք Աստուծոյ, որ ունինք մեր հայրենիքը` Հայաստանը, ուր պէտք է յաճախ երթանք եւ այցելենք, միեւնոյն ժամանակ ալ պէտք է կապ հաստատենք մեր բնօրրանին մէջ գտնուող մեր հայրենակիցներուն հետ եւ յայտնենք, որ կ’ընդունինք զիրենք: Ո՞վ գիտէ, թերեւս շատեր կան, որոնք տակաւին չեն յայտնած իրենց հայու արմատ ունենալը եւ կամաց-կամաց պիտի յայտնուին անոնք»:
Հ – Ձեր յաջորդ ծրագիրներուն մասին ալ խօսինք, արդեօք այս ֆիլմին շարունակութիւնը պիտի նկարահանուի՞: Պիտի շարունակէ՞ք համագործակցիլ Սթիւըն Սիմի հետ:
Պ – Այո՛, մեր համագործակցութիւնը պիտի շարունակուի: Ապագային պիտի երթանք Երզնկա, Ակն եւ այլ վայրեր: Դարձեալ պիտի երթանք Խարբերդ եւ հնութիւններ տեսնենք ու նկարահանենք: Տակաւին շատ շինութիւններ եւ կառոյցներ կան, որոնք պէտք է նկարենք, ինչպէս նաեւ պիտի հանդիպինք մարդոց, որոնց հետ զրուցելով իրենց արմատներուն մասին շատ բաներ պիտի յայտնաբերենք: