«Արցախփրես»․- Արցախի կառավարութեան եւ «Քաշաթաղ» բարեգործական հիմնադրամի ֆինանսաւորմամբ՝ Իշխանաձորի մէջ կը կառուցուի եւս 11 առանձնատուններ, որոնք պիտի տրուին բազմազաւակ ընտանիքներու եւ վերաբնակիչներու:
Իշխանաձոր համայնքի ղեկավար Արսէն Թէյլունց ընդգծեց, որ գիւղին մէջ կ՛ապրի մօտ 400 բնակիչ, ծնելիութեան թիւը կ՛աճի եւ համայնքին մէջ արդէն ունին 5 բազմազաւակ ընտանիք, որոնք կ՛օգտուին պետական նպաստներէն:
«Համայնքին մէջ կը գործէ դպրոց, ուր կը յաճախէ մօտ 100 աշակերտ, որոնցմէ 60ը` նախադպրոցական խումբերու մէջ: Ի դէպ, մօտ օրերս պիտի սկսին դպրոցի վերանորոգման աշխատանքները:
«Ուրախութիւն բոլորիս` տարիէ տարի կ՛աւելնայ դպրոց յաճախողներուն թիւը: Համայնքին մէջ ակնառու է վերաբնակիչներու թիւի աճը. Անոնք հիմնականօրէն Լիբանանէն, Սուրիայէն եւ Հայաստանի տարբեր մարզերէ եկածներն են: Նշեմ նաեւ, որ օրերս «Թուֆենկեան» հիմնադրամին կողմէ վերակառուցուած եւ շահագործման յանձնուած է սուրիահայ բժիշկ Հայկ Խաչատրեանի առանձնատունը,- ըսած է Թէյլունց եւ աւելցուցած,- գիւղին մէջ կը գործէ բուժկէտ եւ ունինք «Վազ» մակնիշի մեքենայ:
«Գիւղը կ՛օգտուի շուրջօրեայ ջրամատակարարումէն: Արցախի Հանրային հեռուսատատեսութիւնը եւ համացանց կապը հասանելի են գիւղի բնակչութեան: Միջպետական եւ գիւղի ճանապարհներու բարեկարգման աշխատանքները ընթացքի մէջ են»:
Իշխանաձոր համայնքի ղեկավարին տեղեկացմամբ` բնակչութեան հիմնական զբաղումը անասնապահութիւնն ու գիւղատնտեսութիւնն է:
«Բնակչութիւնը կատարած է 1000 հա աշնանացան ցորեն, գարի, եգիպտացորեն։ Կ՛ակնկալենք ստանալ 30-40 կենդինար բերք», աւելցուցած է ան:
Խօսելով գիւղին մէջ առկայ խնդիրներուն մասին` Թէյլունց նշած է, որ համայնքը ակումբի շէնք չունի, կազ չունի, փոքրիկ իշխանաձորցիները տակաւին մանկապարտէզի կարիք ունին:
