Մեծի Տանն Կիլիկիոյ կաթողիկոսութեան նախաձեռնութեամբ, Արցախի Մարտակերտի շրջանի Նոր Ղազանչի եւ Կիչան համայնքներու հարեւանութեամբ կառուցուող «Նոր Կիլիկիա» անունով գիւղ մը հաստատուեցաւ իր նորակառոյց բնակարաններով եւ անհրաժեշտ կառոյցներով ու յարմարութիւններով: Արամ Ա. կաթողիկոսի եւ Արցախի իշխանութեան յատուկ կարգադրութեամբ «Նոր Կիլիկիա»ի տուները առաջնահերթութեան կարգով պիտի յատկացուին Արցախի նահատակներու ընտանիքներուն:
«Նոր Կիլիկիա» գիւղի բնակարաններու շինութեան երկրորդ հանգրուանը աւարտած է եւ պաշտօնական բացումը տեղի ունեցաւ Մայիս 8ին: Պաշտօնական բացումին, յանուն Մեծի Տանն Կիլիկիոյ կաթողիկոսութեան մասնակցեցաւ Ազգային Կեդրոնական վարչութեան Կրօնական ու Քաղաքական ժողովները ներկայացնող պատուիրակութիւն մը:
