Հայոց բանակի կազմաւորման 25րդ տարեդարձին առիթով Հայաստանի Հանրապետութեան եւ Արցախի Հանրապետութեան բարձրագոյն ղեկավարութիւնները այցելեցին Եռաբլուր, յարգանքի տուրք մատուցանեցին իրենց կեանքը Հայրենիքի անկախութեան համար զոհաբերած հայորդիներու յիշատակին:
«Եռաբլուր» պանթէոն այցելեցին ՀՀ նախագահ Սերժ Սարգսեան, Արցախի Հանրապետութեան նախագահ Բակօ Սահակեանը, Ամենայն Հայոց կաթողիկոս Գարեգին Բ կաթողիկոս, Ազգային Ժողովի նախագահ Գալուստ Սահակեան, վարչապետ Կարէն Կարապետեան, բարձրաստիճան այլ պաշտօնեաներ: Անոնք ծաղիկներ դրին սպարապետ Վազգէն Սարգսեանի, զօրավար Անդրանիկի շիրիմներուն եւ Արցախեան պատերազմին զոհուած ազատամարտիկներու ու զինծառայողներու յիշատակը յաւերժացնող յուշակոթողին:
1992ի Յունուար 28ին Կառավարութիւնը ընդունեց «Հայաստանի Հանրապետութեան Պաշտպանութեան նախարարութեան մասին» պատմական որոշումը` ատով իրաւականօրէն ազդարարելով Հայոց Ազգային բանակի ստեղծումը: 1992ի Մայիսին պաշտպանութեան նախարարութիւնը սկսաւ առաջին զօրակոչը հանրապետութեան տարածքին` հիմք դնելով բանակը ժամկետային զինծառայողներով համալրելու աւանդոյթին:
Հայոց բանակի օրուան առիթով ՀՀ նախագահական նստավայրին մէջ տեղի ունենացաւ պարգեւատրման արարողութիւն, իսկ երեկոյեան` տօնական համերգ:
Յունուար 29ին Մայր Աթոռ Սուրբ Էջմիածինի մէջ հանդիսապետութեամբ Գարեգին Բ․Ամենայն Հայոց Կաթողիկոսի, մատուցուեցաւ Սուրբ Պատարագ: Կատարուեցաւ նաեւ Հանրապետական մաղթանք` Հայրենիքի խաղաղութեան եւ անսասանութեան համար:
