«Արմենփրես»․- Ըստ Nouvelles d’Armenie-ի, Ֆրանսայի նախագահի թեկնածու Նիքոլա Տիւփոն-էնյան կը խոստանայ ընտրուելու պարագային Ապրիլ 24ը ընդգրկել երկրի ազգային յիշատակի օրերու ցանկին մէջ:
Իրեն ուղղուած հարցումին, թէ արդեօք պիտի կը շարունակէ՞ աւանդոյթը, երբ Ֆրանսայի նախագահը իւրաքանչիւր Ապրիլ 24ին կը մասնակցի Փարիզի մէջ կազմակերպուող յիշատակի արարողութիւններուն, Էնյան նշած է. «Իւրաքանչիւր տարուան Ապրիլ 24ին Ֆրանսայի մէջ տեղի կ՛ունենան Հայոց Ցեղասպանութեան նուիրուած ձեռնարկներ։ Ատիկա Ֆրանսայի պատիւն է` ի յիշատակ եղբայրական ժողովուրդի ողբերգութեան: Ի հարկէ, ես պիտի մասնակցիմ իբրեւ նախագահ` յարգանքի տուրք մատուցելով Ֆրանսայի հայ համայնքին: Ատիկա բոլոր հայերուն համար յատուկ օր է եւ պիտի դառնայ ազգային յիշատակի օր»:
Անոր խօսքով` այդ կերպով Ֆրանսան յարգանքի տուրք կը մատուցանէ Հայոց ցեղասպանութեան զոհերու յիշատակին, ցոյց տալով, որ կը շարունակէ աջակցիլ իր քաղաքացիներուն` աշխարհի ժողովուրդներու ժխտողականութեան դէմ. «Որպէսզի ճշմարտութիւնն ու պատմական իրականութիւնը ճանչցուի»:
Հարցումին` ինչպէ՞ս կը վերաբերի Եւրոպական Միութեան Թուրքիոյ հնարաւոր անդամակցութեան, Էնյան ըսած է, որ ինք ֆրանսացի քիչ քաղաքական գործիչներէն է, որ 2003էն հետեւողականօրէն դէմ արտայայտուած է Թուրքիոյ անդամակցութեան Եւրոպական Միութեան: «Ես մշտապէս պայքարած եմ այդ անդամակցութեան դէմ, ինչ որ չի համապատասխաներ ԵՄ գաղափարին», ընդգծած է Ֆրանսայի նախագահի թեկնածուն:
Ֆրանսայի նախագահի ընտրութիւնները տեղի պիտի ունենան Ապրիլ 23ին: Եթէ թեկնածուներէն ոեւէ մէկը չստանայ ձայներու կէսէն աւելին, ապա երկրորդ փուլը տեղի պիտի ունենայ Մայիս 7ին:
