Տոքթ. Անի Հասըրճեան
Անցնող քանի մը ամիսներու ընթացքին պսակաձեւ ժահրի եւ Covid-19 հիւանդութեան պատճառով յառաջացած համաճարակը համայն մարդկութեան համար եղած է առօրեայ մտահոգութիւն եւ տագնապ։ Պսակաձեւ ժահրի յայտնագործման առաջին օրէն ի վեր աշխարհի վրայ վարակուողներու թիւը օրէ օր աւելնալով` ներկայիս 6 միլիոնը անցած է, մահերու թիւը մօտեցած 400 հազարի եւ համայն մարդկութիւնը կը տառապի այս լուրջ համաճարակի անսանձ տարածուելէն։ Հոս կ՛ուզեմ շնորհակալութիւն յայտնել բոլոր բժիշկներուն եւ անձնուիրաբար ծառայող բոլոր անհատներուն համաճարակը կասեցնելու իրենց ճիգերուն համար:
Պսակաձեւ ժահրին պատճառով արտակարգ իրավիճակին հետ դէմ յանդիման կը գտնուինք բոլորս` Համայնքային Առողջապահութեան խոհրդատուներու կողմէ տրուած` «Տունը Մնա՛» «Ապահով Մնա՛» եւ «Առողջ Մնա՛» յորդորներով։ Այսօր ամէն ժամանակներէ աւելի շեշտակի կը դառնայ իւրաքանչիւրիս համար առողջ մնալու կարեւորութիւնը՝ հետեւելով կանխազգուշացման եւ կանխարգիլման ցուցմունքներուն։
«Ինքնամեկուսացումը» համաճարակը չտարածելու կ’օժանդակէ եւ երբ բոլորս հլու-հնազանդ ըլլանք վերոյիշեալ յորդորներուն, իւրաքանչիւրս մեր կարգին կը նպաստենք համայնքային առողջապահութեան։
Բոլորս առօրեայ տխուր լուրերով ողողուած, վստահաբար կ’ազդուինք համաճարակի պատճառով պարտադրուած ֆիզիկական մեկուսացման իրավիճակէն։ Այս կրնայ տարբեր ձեւերով հոգեբանական հակազդեցութիւն ունենալ իւրաքանչիւր անհատի համար։ Ես կը նախընտրեմ «ֆիզիքական մեկուսացում» անուանել այս երեւոյթը քան՝ «ընկերային մեկուսացում»։ Անձնապէս, անցնող 2-3 ամիսներու ընթացքին շատ աւելի ընկերային շփման մէջ եղած եմ մեծ թիւով բարեկամներու, հարազատներու, գործընկերներու եւ դիմատետրի ընկերներու հետ, որովհետեւ նախահամաճարակի շրջանին, գործով բազմազբաղ ըլլալով, ժամանակ չունէի եւ այսքան տարողութեամբ չէի օգտուեր Համացանցի Zoom, Skype եւ այլ հաղորդակցական միջոցներէն։ Ամէն առաւօտ փառք կու տամ արհեստագիտութեան, որ համակարգիչով կ’արտօնէ շատերու կարողանալ իրենց գործերը տունէն շարունակելու, աշակերտներուն դպրոցական դասընթացքները որոշ չափով «հեռակայ» սերտելու եւ այսպիսով՝ կեանքը ամբողջութեամբ չանդամալուծելու։
Իմ պարագայիս՝ որպէս ատամնաբոյժ կարելի չէր աշխատիլ բացի իբրեւ «Հեռաձայնային Ատամնաբուժութեամբ Շտապօգնութիւն» (Tele Dentistry for Emergencies): Պարտադիր մեկուսացումի առաջին օրէն ընտանիքիս անդամներուն կատակով յայտարարեցի «Doctor օf Dental Surgery» (DDS) տիտղոսը կը փոխարինեմ ուրիշ DDS-ով մը՝ «Dan Digin Sevices»-ով, «Տան Տիկնոջ Ծառայութիւններ»ով: Մեծ հաճոյքով խոհանոցին մէջ ժամեր անցնելով կը ջանամ ժամանակ պահանջող Հայկական ճաշեր պատրաստել, անցեալին յաճախ զլացած ըլլալու «մեղքս քաւելու» համար։ Նաեւ ժամանակացոյցս խիստ խճողուած է օրական քանի մը Dental Webinar-ներու, Medical Town Hall-երու, ժողովներու եւ այլ յայտագիրներու հետեւելով։ Հայկական առածի բառերով «գլուխս քերելու ժամանակ չունիմ» եւ չեմ հասնիր օրուայ ընելիքներուս ցանկը ամբողջացնելու, սակայն կը զարմանամ, երբ լսեմ ոմանք կը ձանձրանան։
Կիրակի օրերուն, մէկ եկեղեցի յաճախելու փոխարէն քանի մը եկեղեցիներու պատգամներուն ու պատարագներուն համացանցով կը հետեւիմ. անոնք բոլորը «մեր տունը կու գան եւ կ’օրհնեն»։ Ես կ՛անճրկիմ, եթէ նոյն ժամուն են, որու՞ն ամբողջութեամբ կրնամ հետեւիլ՝ Հայաստանէն ապա Լիբանանէն, Արեւելեան Միացեալ Նահանգներէն, Գանատայէն դէպի Արեւմտեան Միացեալ Նահանգներ եւ այլն։
Միայն կարելի է դարձեալ փառք տալ տեղեկատուական եւ հաղորդակցական արդի միջոցներուն համար։ Ամէն առաւօտ, հեռատեսիլի տեղական լուրերու կողքին, Հայաստանի« Լիբանանի եւ համաշխարհային առողջապահական, քաղաքական, տնտեսական եւ այլ նորութիւնները կարդալ եւ ունկնդրել համացանցի վրայ առաւելութիւն է, սակայն ամէնուրէք եւ մանաւանդ Հայրենիքի տագնապալի վիճակը կ’ազդէ մեր վրայ։ Լաւատեսութեամբ, դրական կեցուածքով մեր նիւթական եւ բարոյական օժանդակութեամբ զօրավիգ կանգնինք մեր ազգի զաւակներուն եւ իսկական Հայ Քրիստոնէական մեր հաւատքով աղօթենք մեր Հայրենիքի եւ համայն աշխարհի բարօրութեան համար։
Ատամնաբոյժ Տոքթ. Անի Հասըրճեան կը բնակի եւ կը գործէ Թորոնթոյի մէջ: Իր ազատ ժամերուն, ան համայնքի գործիչ եւ ղեկավար է: